Nalzaro: Bugti sa mga maayong binuhatan

BISAN kon unsa pa ang iyang tumong, pulitika o personal, angayan natong paha­lipayan ug pasalamatan si Cebu City south district Congressman Tomas Osmeña gumikan aa iyang paghatag pasidungog pinaagi sa money reward ngadto ni PO2 Lea Juarez, ang policewoman nga nakapusil-patay og usa ka tulisan atol ginukdanay niadtong miaging semana.

Singkuwenta mil ka pesos ang gihatag nga reward ni Kong. Osmeña ngadto kang Juarez butang nga gikalipay usab sa policewoman. Una nang nakadwat si Juarez og P10 mil gikan sa Police Regional Office (PRO 7) ug ingon usa ka 9 mm pistol gikan sa iyang hepe nga si S/Supt. Patrocinio Comendador.

Busa salamat ni Kong. Osmena kay iyang nakita ang bayanihong binuhatan nga nahimo ni Juarez. Ang gihimo ni Kong. Osmeña nakapadasig sa ubang mga tinugyanan sa balaod nga
magtinarong sa ilang binuhatan. Mao nay giingon nga bugti sa maayong binuhatan.

Magpakita og dedikasyon sa ilang trabaho nga motubag gayod sa katungdanan. Sila si Mayor Mike Rama ug Gov. Gwen Garcia dili mohatag og pasidungog ni Juarez? Taga CPPO baya ni si Juarez, Madam Governor.

PAHALIPAY

Kini hinuon si Kong. Osmeña basta kabahin sa kriminalidad, mohatag gyud ni siya og dakong pagtagad ngadto sa mga pulis nga nakahimo og maayong binuhatan. Wala ako moingon nga siya ang nagpaluyo sa vigilantes niadtong mayor pa siya. Apan siya maoy nagdasig sa mga pulis nga mogukod sa mga kriminal. Iyang gipanghatagan og tag P20 mil ang pulis nga makapatay og tulisan atol legitimate operation. Daghan ang nakadawat niadto kay daghan man ang nangamatay. Kurog god ang mga badlungon sa katilingban. Labi pa sa pagtumaw niadtong vigilantes. Nanglayas ang uban gikan dinhi sa siyudad.

Si Juarez nga nadestino sa intelligence branch sa Cebu Provincial Police Office (CPPO), nagsakay og motorsiklo uban sa iyang kaubang pulis. Pag-abot nila sa may Cebu Business Park, ilang nakit-ang ang usa ka babaye nga nagsiyagit kay gitulis sa duha ka mga lalaki nga nagsakay usab og motorsiklo. Ilang gidoul, apan kalit nga misibat ang duha ka mga suspetsado dala na ang mga butang sa biktima. Ila kining gigukod hangtod mga mi-abot sila doul sa may Capitol compound. Na-corner ang mga suspek. Ang usa kalit nga mibunot sa iyang armas de fuego hinungdan nga gi-unhan kini pagpusil ni Juarez.

Aw, hastang pagkapataya. Ang usa ka suspek nadakpan. (bobby.nalzaro@yahoo.com)