Barrita: Pilipinas mao nay mipahuwam sa IMF
-A A +ATikdul-Tikdol
Sunday, June 24, 2012
NIUMENTO na gyud diay ang ekonomiya sa Pilipinas. Tiaw mo ba kana nga kaniadto kitay sigig pangutang sa International Monetary Fund (IMF).
Karon ang Pilipinas na maoy nagpahuwam sa IMF og usa ka bilyon dolyares nga gamiton sa pagtabang sa pag-stabilize sa crisis nga niigo sa Uropa.
Niasenso na ang Pilipinas. Kamo, niasenso mo?
***
Nabayran na sa Pilipinas ang tanang utang niini sa IMF niadtong tuig 2006.
Sumala pa ni manlalaban Edwin Lacierda, tigpamaba sa Macanang, obligasyon sa Pilipinas
ang pag-ayuda sa mga kabos nga nasod.
Unya, duna pa gyuy interest, matod pa sa taga Bangko Sentral ng Pilipinas.
Hayahay na diay kita karon? Apan nganong nisaka man ang gidaghanon sa mga kabos ug sa mga gipanggutom?
***
Sud sa kapin sa 40 ka tuig, sigig pangutang ang Pilipinas sa IMF hangtod nga naimpas ang atong tanang utang niadtong Disyembre sa 2006.
Mao kini ang atong bawos sa IMF nga kaniadto maoy magbuot unsay buhaton sa Pilipinas mahitungod sa mga fiscal reforms.
Unsaon, nilig-on na man ang atong ekonomiya.
Pero nganong naglaraw man ang gobyerno nga umentohan ang conditional cash transfer gikan sa P34 bilyunes karong tuiga ngadto sa P45 bilyunes sa sunod tuig?
***
Gipahibawo ni Kongresista Eduardo “Eddiegul” Gullas (Cebu, 1st district), nga anaa na karong sa ikatulo ug kataposang termino, nga ang iyang apo, si Gerard Anthony “Samsam” Gullas Jr., maoy iyang padaganon sa pagkakongresista sa eleksyon sa sunod tuig.
Matod pa ni Mayor Valdemar Chiong sa syudad sa Naga, iyang paluyohan si Samsam uban sa
laing upat ka mga mayor sa distrito.
Panahon na sa mga batan-on nga mokupot sa reinda sa pangagamhanan.
***
Niingon si Mayor Chiong nga “ang santol mamunga ra gyud og santol.” Apan kon moadto ka sa Department of Agriculture, makahibawo ka nga mahimong pabungahon og laing prutas ang usa ka kahoy pinaagi sa grafting.
Apan ang buot niyang ipasabot nga mapaabot sa taga primero distrito sa samang kalidad sa serbisyo sa apohan nga si Kongresista Gullas.
Sa ginaingon pa, kon unsa ang punoan mao usab ang bunga. Mao bitaw nga alang sa mga mag-uuma, kon makatilaw og prutas nga tam-is, hipuson ang liso kay itanom ug paliwatan.
Pero dihay nisuway pagtanom sa tukog sa ice drop kay paliwatan kay lami, tam-is ug bugnaw pa gyud. Nadismaya siya kay wa gyud moturok.
Gipatik sa mantalaang SuperBalita Cebu Hunyo 25, 2012.
Opinyon
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
