Editoryal: Pahibalo sa Santo Papa

DAKONG kalibotan sa tibuok kalibotan sa Simbahang Romano Katoliko ang ipahigayon sa dak­bayan sa Sugbo sa tuig 2016 -- ang 51st International Eucharistic Congress (IEC).

Si Pope Benedict XVI, lider sa usa sa labing dako ug gamhanang simbahan sa kalibotan nga Romano Katoliko, maoy nipahibalo sa sunod nga dakong panag­tapok sa Sugbo atol sa iyang pakigpulong sa pagtapos sa miaging semana sa 50th IEC sa Croke Park Stadium sa Dublin, Ireland.

Liboan ka mga bisita ang gipaabot nga mohugpa sa Sugbo ug ang Santo Papa maoy gipaabot nga manguna sa dakong panag­tapok dinhi sa mga obispo, kaparian, layko ug yanong parokyano gikan sa nagkalainlaing nasod sa kalibotan.

Dako kining pagpangandam sa lokal nga simbahan sa pagpahiluna sa daghang bisita labi na sa seguridad sa Santo Papa.

Laing dakong hagit kini sa mga lokal nga lider sa simbahan sa nasod nga naila nga bugtong Kristiyano sa Asya ug mayoriya ang mga Romano Katoliko.

Ang pagpahigayon sa 51st EIC dinhi nagdala og dakong mensahe diha sa pagpalig-on sa simbahan nga gihamok sa daghang isyu ug mga ataki gikan sa ubang sekta.

Haom usab human madeklarar na unya ang ikaduhang Filipino ug unang Bisaya nga santos nga si Blessed Pebro Calungsod, diin ang kanonisasyon nga gikatakda karong Oktubre ning tuiga.

Tukma usab nga si Arsobispo Jose Palma sa Artdiyosis sa Sugbo maoy pangulo karon sa Catholic Bishops Conference in the Philippines (CBCP).

Dili kaha madeklarar usab si Arsobispo Palma sa pagka Cardinal atol sa pagbisita sa Santo Papa? Maayo unta. Ang Sugbo daan nang kabahin sa mabulukong kasaysayan sa simbahan ug Kristiyanismo.