Nadela: Pagpili: flyover o ospital?

NIDANGOP ko sa Vicente Sotto Memorial Medical Center (CCMC) sa miaging Sabado sa kaadlawon tungod sa usa ka emergency. Dunay insekto nga nisud sa dunggan ni misis ug tungod sa sigi niyang hilak nakahukom ko sa pagdala kaniya sa usa ka pribadong tambalanan. Way suwer­te kay way doktor nga makaatiman sa ingon niining problemang medikal panahon sa kaadlawon.

Dunay nagtambag nga sa VSMMC na lang mamasin. Salamat kay ang taga emergency room mahigalaon kaayong niatiman ni misis og pasado ala una sa kaadlawon nakuhang insekto nga nakapahasol kaayo niya. 

Sa wa pa maatiman si misis niliraw ang akong mga mata sa daghan kaayong talan-awon sa sud sa ER mga pasyente nga nag-abot abot gikan sa nagkadaiyang kalungsoran. Mga pasyente nga nagsugwak ug naabot na gani sa agianan tungod sa ilang kadaghan. Bisan didto sa ENT Room diin giasikaso si misis tua sab didto ang daghang pasyente nga nag-antos sa nagkadaiyang balatian. 

Sa mga pasilyo nga among naagian daghan gihapong pasyente kay di na masud sa ilang tagsa tagsa ka ward. Didto sa gawas sa building, ilawom sa mga tanom  nangligdas ang mga pamilya sa pasyente kay way laing kapahuwayan.

Sa akong kaugalingon nakaingon ko, kong may kuwarta palang ning maong mga pasyente di unta ni sila mag-antos sa ingon niini nga kahimtang.

Kay kabus man magpasalamat nalang ta sa taga VCMMC, sa ilang padayon nga pagpangalagad bisan kong ang maong tambalanan gidesinyo ra unta sa igo-igo nga gidaghanon sa mga pasyente. Way mahimo ang tagdumala sa tambalanan gawas sa pagdawat og mga pasyente bisan kong wa nay kabutangan. Akong nakita ug nisipra ang tinud-anay nga kahimtang sa atong katilingban.

Ang mga politiko nga maayo lang sa saad, flyover hinuon ang nahunahunaan, unta ang panglawas sa mga kabus maoy paboran. Nakadungog na ba gud mo og politiko nga nagpa-admit og district hospital? Kinsang politikoha nga na-admit og Cebu City Medical Center (CCMC) o VSMMC. Maayong sa sunod nilang kasakit, adto sila magpatambal aron makasinati sab sila og kapait.

Busa, sa di pa mo magpadala sa lansis sa mga mokandidato sa eleksyon sunod tuig, siguro-ang may kasingkasing sila nga maghunahuna sa atong panglawas, di kay pulos infrastructure ang naa sa ilang hunahuna. Maghisgut ta og infra, ang Binisaya daw ani “komisyon”.