Espinoza: LRT dili BRT ang angayan sa dakbayan

BRT. Ang Bus Rapid Transit (BRT) maayo og konsepto kay daghan ang makasakay sa usa ka bus og paspas ang dagan kay adto ra man mourong sa bus stop apan kini kon ang kadalanan sa dakbayan sa Sugbo sama kalapad sa Colombia o USA.

Tungod kay dagko man ang bus kay sa PUJ duna gyuy kausaban unya ang kadalanan sa dakbayan. Sa di halapad nga dalan duha ra ka paagi ang mahitabo: palapdan, apan morag di mahitabo tungod sa kamahal sa yuta o, di na paagian sa PUJ ug bus na lang ang moagi.

Angayan nga mahadlok ang PUJ drivers ug operators nga mawad-an sila og pa­nginabuhian inig sugod og dagan sa mga bus sa BRT sa dak­bayan sa Sugbo tungod kay dunay dakong posibilidad nga mawala ang mga jeepney sa kadalanan.

Ang pasalig ni Colin Brader, managing director sa Integrated Transport Planning Ltd., nga way PUJ driver nga mawad-an og trabaho mogawas nga usa ka panglingla o bakak tungod kay ang PUJ mawani man sa BRT. Apan mao ni gusto sa kadaghanan nga mawala ang PUJ.

Wa koy supak sa BRT tungod kay nakita nako unsa ka hapsay ug kapaspas ang serbisyo sa bus didto sa gawas sama sa Australia. Apan ang mga dalan ning dapita haskang lapara ug way mga PUJ nga nagbiyahe.

Karon, ang atong kadalanan sa dakbayan sa Sugbo ma­puno man gani sa oras ting-eskuyla ug ting-uli sa mga sakyanan labina sa PUJ unsa na kaha ang dagan unya sa trapiko inig sugod sa BRT?

Miingon si Brader nga dunay kaugalingon agian o “special lane” ang BRT aron di mabara sa trapiko. Ambot kon giobserbahan ba kaha ni Brader ang dagan sa atong trapiko sa tanang adlaw ug sa oras nga trapik kaayo? Wa man gani motultol sa PUJ lane ang mga drayber.

Ang gipasabot ni Brader ngadto sa tigbalita atol sa press briefing ang katuyoan o ang pag-implementar ra man gyud sa BRT ug morag wa man niya gilantaw ang dakong problema unya sa trapiko inig sugod og dagan sa mga bus.

Dunay 240 ka bus ang mobiyahe gikan sa Barangay Bulacao nga mohapit sa Ayala Center Cebu ug lahos sa Barangay Talamban. Sus, ang trapiko ani nga rota sa oras ting-uli haskang grabeha. Adto tingale sa hangin moagi ang BRT.

Sa Metro Manila nga halapad ang dalan sa Edsa ug dunay special lane ang mga bus apan mabara lang gihapon ang dagan sa mga bus tungod sa kadaghan sa sakyanan nga moagi sa kadalanan. Ang LRT ug MRT sa Manila nakatabang sa problema sa trapiko.

Ang pasalig ni Brader nga di mawad-an og pamugas ang mga PUJ drayber tungod kay nagkinahanglan sila og 480 ka mga drayber nga bahinon sa duha ka shifting nga mosugod sa alas 6 sa buntag hangtod alas 12 sa tungang gabii. Ang mga operator sa PUJ ang yayay.

Si Mayor Mike Rama di na makaatras ani nga proyekto tungod sa dihang bise mayor pa siya iya man nga giindorsar og maayo. Unya niadtong higayona nagpaitoy-itoy pa siya ni Tomas tungod kay modagan siya pagka mayor.

Ang maayo alang sa dakbayan o di ba sa alang Metro Cebu nga publiko nga transportasyon nga way sagabal sa kadalanan mao ang light rail tract (LRT) tungod kay naa man sa ibabaw ang relis.

Ang LRT sama sa Bangkok ug didto sa mga progrisbong nasud maoy naghatag kasulbaran sa
grabeng trapiko. Di na halos molihok ang trapiko sa Bangkok kaniadto. Karon, tungod sa LRT mikusog ang biyahe ug hapsay na ang trapiko kadalanan.

Bisan sa LRT nga nagtuyok sa kadalanan sa Bangkok mas daghan gihapon ang mga turista nga moadto kay dinhi sa ato. Ang rason man gud ni Tomas nga supak siya sa LRT kay madisgwapa kuno ang Sugbo.

Ang proyekto ni Kong. Eddie Gullas nga LRT gikan sa sur sa Cebu nga motadlas sa siyudad padung sa norte gibabagan ni Tomas sa rason nga madaut kuno ang hitsura sa dakbayan. Estoryaheeee!

Mibabag si Kongresista Tomas tungod kay nahinayak na siya sa BRT nga iyang proyekto sa mayor pa siya. Sa akong tan-aw nahadlok si Tomas nga malamposon unya ang LRT ni Gullas apan palpak ang iyang BRT.

(elespinoza53@yahoo.com)