Editoryal: One Cebu ‘natay-og’

DAKONG pagkatay-og sa kalig-on sa partido sa administrasyon sa lalawigan sa Sugbo, One Cebu, nunot sa gikataho nga pakig-alyansa sa Bakud Party sa Liberal Party (LP) alang sa lokal nga eleksyon sa 2013.

Wala pay pormal nga deklarasyon sa giingong bag-ong alyansa, apan nabaniog na nga si Bise Gob. Agnes Magpale didto sa Malacañang ug nakahina­bii si Presidente Benigno Aquino III.

Mao kini ang sinugdanan sa hugonhugon nga sii Magpale mokandidato sa pagka bise gobernador isip runningmate ni Junjun Davide, Jr. sa LP.

Nasayran nga si Magpale gitanyagan usab sa One Cebu nga runningmate ni Kong. Pablo John Garcia, kinsa mokandidato sa pagka gobernador puli sa iyang maguwang nga si Gob. Gwen Garcia nga motapos na sa iyang termino ug mokandidato sa pagka senador.

Dili ba taudtaod na ang alyansa sa One Cebu ug Bakud? Nganong kalit nausab ang nauli?

Kon tinuod ang bag-ong Bakud-LP nga alyansa, ang Bakud pormal ba nga nakigsulti sa kadagkoan sa One Cebu bahin sa ilang pagputol sa relasyon?

Sila si Gob. Garcia ug Kong. PJ Garcia nipadayag sa ilang kakurat sa kausaban sa baroganan sa Bakud ug wala silay nakita nga rason sa kahiubos o kasuko sa ilang relasyon sa partido.

Wala kita masayod sa nagpaluyong rason bahin sa kabag-on sa plastada sa pulitika sa Sugbo apan tataw nga imahen sa pagmaniobra sa karaang matang sa pulitika. Sa tinamban nga pulong, ‘balem­bing’ o mosakay gyud sa kuwartahan ug impluwens­ya sa
administrasyon.

Samtang nagkaduol ang pag-file sa sertipiko sa mga kandidatura karong Oktubre, daghan pang surprisa nga panghitabo sa nagtumaw pa gihapon nga karaang pulitika.

Manghinaut lang kita nga magmalinawon.