Lariosa: Kultura sa pag-ampo

HUSTO kaayo si Cardinal Vidal sa iyang gibarugan nga ang mga magbabalaod mokonsulta unta gyud sa katawhan sa ilang mga balaudnon nga ipasaka sa Kongreso aron mahibaw-an ang pulso.

Kay sila man ang gipili nga mga representante nga modala sa ilang tingog anga­yan lang kuno nga sila konsultahon ug paminawon. Di kay ila rang pagbati ang patalinghugan hangtod mabaraw lang hinuon sila.

Kini ang nahitabo sa House Bill 6360 nga magdili sa pagpamutang og mga religious icons sa mga buhatan sa kagamhanan ingon man paghimog seremonyas kalabot niini. Tungod sa kusganong pagbabag sa nagkadaiyang sektor sa katilingban kini nabaraw.

Bahag ang ikog ni Kabataan Party-List Congressman Raymond Palatino kinsa maoy amahan sa balaudnon sa iyang pag-withdraw niini sa Ubos Balay-Balauranan. Klaro nga siya nanlipaghong sa kauwaw

Nakasabot ta sa tuyo nga gipasikad sa Batakang Balaod. Apan nibalingis sa hustong pagsabot. Kon iyang tuyo kaangayan sa ubang relihiyon nan pabutanga ug pahimoa sad sila sa ilaha. Way magbuot kay freedom of religion man.

Kon wagtangon ang larawan sa Birhen ug ubang mga santos diha sa buhatan sa kagamhanan gisupak niini ang kagawasan sa relihiyon sa mga katuliko. Mosamot ang kalapasan kon idili na sad ang pagmisa sa maong mga buhatan.

Angayng sad masayod ang tanan nga kining pagpamutang o paghalad sa mga santos diha sa altar sulod sa panimalay ug sa mga buhatan sa kagamhanan o pribado apil na sa public places usa na ka kultura diha sa pag-ampo sa mga katuliko.

Kay kultura, di na ni matang-tang o maukang gikan sa kinaiya, batasan o gusto sa mga katuliko ka­labot sa ilang pagtuo labi na sa mga Sugbuanon bisan pilo-piluon pa kanang mga balaod pagwagtang niini. Natisok na ni sa kasingkasing sa buhilaman (civilization) sa mga Kristiyanos nga mga katuliko.

Kahinumdoman nga sa pag-abot sa mga Katsila dinhi sa ato gisakyan nila ang kultura sa atong mga katiguwangan sama sa pagtuo sa mga espirito sa kinaiyahan nga ubanan nila sa pag-ihaw og mga hayop pahinungod kanila agig pasalamat .

Dinhi gibase ang mga pista pahinungod sa mga santos nga patron nga nasugdan pag-abot sa mga Katsila aron pagdanig samot sa atong mga katiguwangan ngadto sa bag-ong pagtuo sa usa lamang ka Diyos.

Kon nahinayon pa ang House Bill 6360 nga nahimong balaod pabilo unta kini sa kagubot. Kay daghan ang di mosunod kay di man nila matulon nga supakon nila ang kultura nga namat-an nilag mahayag.

Maayo nga nakasabot si Kongresista Palatino ug kapanaminan kini sa ubang mga kongresista nga mag-public hearing gyud labi na kon talandugon kaayo ang balaudnon nga may kalabutan sa ekonomikanhon, pulitikanhon ug relihiyusong kinabuhi sa katawhan.