Durano: Pagpalaum sa nagpuasa

GIKASAGMUYO sa mga representante sa Japan International Cooperation Agency (JICA) ang kalangay sa pag-ugmad sa ilang gipunduhan nga proyekto sa siyudad nga South Road Properties.

Nila pa nga dul-an napulo ka mga tuig na ang nakalabay human sa pagka-kompleto sa maong proyekto apan hangtod karon mas daghan pa ang mga miturok nga sagbot kay sa mga mituyhakaw nga edipesyo.

Sa pagkakaron, aduna pa’y duha ka mga locators ang nakapalit og luna sa SRP ug maoy pagtuo ni Kongresista Tomas Osmena nga mas makaayong paabuton lang una nga makompleto ang gipabarug sa SM Prime Holdings Incorporated ug sa Filinvest Land kay mosulbong man unya og maayo ang presyo sa lote nga dili na moubos pa sa tag 40 mil pesos ang matag metro kuwadrado.

Angayan natong hinumduman nga mitubo na og bale’g makatulo ka pilo ang atong balayranang utang ngadto sa JBIC sukad sa pagsugod niini niadtong tuig 1995 tungod sa pag-usab usab nga currency valuation sa yen.

Apan bisan pa man niini, ang atong kagamhanan ang relihiyusong nagbayad sa atong utang og 589 milyunes ka pesos alang sa debt servicing matag tuig. Unya sa normal nga dagan sa interes ug sa kantidad sa principal nga atong kayang bayran, molanat pa og kutob karong tuig 2020 una pa kita makahaw-as ning maong bug-at kaayo nga obligasyon.

Pero dili angay ikasakit sa mga Sugbuanon kining maong sakripisyo kay kini ang maghatag man og makapila ka-pilo nga ganansya nga mamahimo na unyang gamiton alang sa pagtubag sa tanang mga gikinahanglang mga edispisyo ug serbisyo nga seguradong makapasulbong sa makinarya sa kagamhanan dinhi sa Sugbo.

Makamugna usab ang SRP og usa ka dakong kahigayunan diin mahimong maila ang Sugbo nga sentro sa patigayon sa tibuok nasud ug posible pang maka-ambas sa mga international port cities susama sa Hongkong ug Singapore.

Mag-uban niining tanan nga paglambo sa patigayon ang paghatag usab og oportunidad sa mga Sugbuanon sa pagpangita og gainful employment ug kining maong grasya ang mahimo pang saw-an pag-apil sa tanang mga Bisaya dinhi sa Visayas ug Mindanao.

Hinuon miyentras nagpabilin pang mga damgo kining tanan, importanteng ato lang usa nga hugtan ang atong mga bakus ug atong bug-uson ang atong huna-huna nga sa kaulahian, hingpit da nga matuman ang atong mga mithi. Kay pinaagi lamang niini nga atong mahikalimtan ang kaaslum nga mugna sa hataas nga puasa.