Editoryal: Daghan pa ang kausaban

UBAY-UBAY na sa mga politiko ang mideklarar na sa ilang puwesto nga daganan sa umaabot nga piniliay sunod tuig.

Pananglitan. Sa unang distrito sa probinsiya sa Sugbo, pormal na nga giindosar ni 1st district congressman Eduardo “Eddiegul” Gullas ang iyang apo nga si Samsam Gullas nga maoy magpapili isip nga mohulip sa iyang luna.

Si Gobernador Gwen Garcia sa niaging pipila na ka semana, mianunsyo nga magpapili siya pagka-senador ug ang iyang manghod nga si 3rd district representative Pablo John Garcia ang modagan sa iyang puwesto nga pagka gobernador.

Ning uwahi lang, ang Bakud Party nga gipangulohan ni Danao City vice-mayor Nito Durano ang giingong nakig-alayon na sa Liberal Party.

Gumikan niini, si Cebu vice-governor Agnes Magpale kinsa ubos sa Bakud Party, maoy mamahimong runningmate ni Hilario Davide III sa pagka-gobernador ug gisalikway ang tanyag sa One Cebu sa mga Garcia nga ipares unta kang Pablo John.

Apan kining tanan wa pay kasiguroan kon mao na ba gyud ni ang ilang daganan.

Daghan pa ang mahitabo sa di pa moabot ang panahon sa tig-file sa certificate of candidacy karong Oktubre.

Kinsay nasayod nga kon maapikihan, di moda­yon si Gov. Gwen pagka senador ug posibling mag-bise kini sa iyang igsuon nga si Pablo John? O kaha modagan sa pagka kongresista sa ikatulong distrito?

Kinsay nasayod nga si Mimo Osmeña, anak ni kanhi gobernador Lito Osmeña, kinsa miangkon nga di pa siya andam sa politika, sa kalit lang makahukom nga modagan alang sa local nga position sa dakba­yan sa Sugbo diin siya marehistro.

Sa gikaingon ko na, daghan pa ang kausaban nga mahitabo.