Nalzaro: Pildeng maglagot

WALA pa gani magsugod ang opisyal nga campaign period apan morag nangampaniya na ang mga gustong mokandidato sa sunod tuig nga eleksiyon dinhi sa dakbayan sa Sugbo. Tiaw pa nimo kanang matag sayo sa buntag pukawon na ang mga mokandidato sa Bando Osmeña Pundok Kauswagan (BOPK) ilang coordinator aron mag-handshaking o manglamano sa mga tawo. Unya pagkagabii, moadto sa mga sityo o barangay aron mopahigayon og pulong-pulong.

Gawas niining mga personal nga kalihukan sa mga mokandidato, mikatap na usab karon ang mga posters ug mga streamers sa pipila ka mga pulitiko. O ba kaha mga teaser o kining pasiuna aron lang ma-ilhan sila sa katawhan o ba kaha ang ilang partido. Sama sa Type O streamer ni Cebu City south district Rep. Tomas Osmena. Ang mga banners ni Tomas nga anaa ang iyang dagway ug nag-awhag sa katawhan nga maminaw sa iyang tulumanon sa usa ka radio station.

BLACK PROPAGANDA

Hinungdan nga nagkagot si Mayor Mike Rama ug mimando kini nga ipatangtang ang tanang mga posters ug streamers nga gipangbitay sa mga kalsada ning siyudad apil na ang streamer sa iyang lolo nga si Don Vicente Rama Sr., nga gipamutang atol sa pagsaulog sa ika-75 nga Charter Day niadtong Pebrero. Dili kay kana lang. Aduna na usay gipamilit karon nga mga poster nga maorag black propaganda batok kang Mayor Rama ug sa iyang Team Rama.

Adunay gipamilit sa mga pader labi pa sa tiilan sa flyovers nga Team Rama. Reject Are all My Allies. Buot ipasabot nga ang mga kaalyado ni Mike puro mga reject. Kinsa man ang tumong niini? Ug si kinsa man kaha ang nagpasiugda niini? Aw, kinsa pa? Alangan man og atong pasanginlan ang taga probensiya. Mugna kuno kini sa tawo o mga tawo nga adunay deperensiya sa ilang paminsar. Aw, mao nay gi-ingon nga; ‘pildeng maglagot’.

Bawos lang pod Mike. Ingna nga ang meaning sa BOPK (Bando Osmeña Pundok Kabungkagon).

BINGO

Ania pay kaboang sa taga BOPK, labi pa ni Vice Mayor Joy Augustus Young. Aron lang gyud maba­niog ang BOPK, nagpasiugda sila og bingo sa kabarangayan. Dili ko makamao moduwa og bingo pero ang atong nasabtan sugal man gihapon ni. Basta naay pusta sugal na na, di ba? Bisan kon mo-ingon ta nga lingaw-lingaw ra na. Unya ang iporma sa cards, inay Bingo, BOPK. makadawat kuno og mga grocery items ang mga mo-apil. Ila naman hinuon nga gisulsulan ang mga tawonga mosugal. Mas maayo pay tabangan ninyo og mga livelihood projects inay sugal. Pagkawalay hinungdan.

(bobby.nalzaro@yahoo.com)