Barrita: Wa nay corporal punishment sa mga bata?
-A A +ATikdul-Tikdol
Thursday, June 28, 2012
GIAPROBAHAN sa Cebu City Council sa boto nga 14-2 ang usa ka ordinance nga magdili sa corporal punishment sa mga bata dinhi sa syudad sa Sugbo.
Buot ipasabot niini nga ang mga ginikanan, mga magtutudlo, mga yaya, mga katabang sa panimalay, caregiver, foster parent, mga paryente ug mga guardian di na makasilot sa ilang mga bata kon makasala sa mga paagi nga makauuwaw, physical ug verbal.
Kay di na man sila makadisiplina, kon magpabadlong gani ang ilang mga anak, na hala, ipadala didto sa Cebu City Council. Sila maoy padisiplinaha.
***
Ubos sa ordinansa nga gipangamahan nila ni Councilor Lea Japson, Alvin Dizon, Margarita Osmena and John Philip Po ll, gidili ang pagbunal, pagpatid, paghapak ug pagsagpa sa usa ka bata ginamit ang sungkod, sapatos, silhig, stick nga kahoy o bakus.
Di kompleto ang maong balaod kay wa man maapil ang pal-ak o tukgay sa kamunggay, sanga sa bayabas o sambag ba kaha, kagingking sa kawayan, ikog sa pagi, latigo sa kabayo, dos por dos, tsinelas, bakya ug uban pa.
Unsa may tulubagon kon latuson ang usa ka bata og pisi ug tumbang sa kabaw?
***
Laing gidili sa maong ordinansa mao ang pagkusi sa mga bata, paglunit o pag-inat sa dunggan, labnot sa buhok, pagyugyog sa bata, pagputol o pag-awot sa buhok, pagtuslok sa panit, pag-alsa, pagguyod ug paglabay sa bata.
Di na sab mahimong pugson ang usa ka bata sa pagpaluhod sa bato, grava ug asin.
Wa maapil ang munggos. Bentaha pa gani ang asin kay mahilis man kon ihian, ang munggos
bisan unsag ihi, duha pa ka adlaw una moturok ug mahimong tawgi.
***
Di kay kana ra. Di na mahimo nga silotan ang bata pinaagi sa pag-squat, kana bang magpungko, pabarugon ug palingkuron nga maghiwi.
Gidili usab ang pagpasagad lang sa physical nga panginahanglan sa usa ka bata, pagpriso kaniya sa hagip-ot nga lugar, paggapos o pagbutang sa usa ka lugar sa dugay nga panahon. Morag gibartolena ba.
Di na sab mahimong yawyawan ang bata, hadlukon, hulgaon, kasab-an, syagitan, balikason, bugal-bugalan ug pakauwawan atubangan sa ubang mga bata ug sa publiko.
***
Kon aprobahan ni Cebu City Mayor Mike Rama ang maong ordinansa, makapaabot kita nga daghang mga ginikanan nga magtingkagol sa prisohan kay giingong nga 75 porsento sa corporal punishment gihimo sa mga ginikanan.
Kinsa pa kaha unyay mobuhi sa ilang mga anak kon napriso na ang mga ginikanan?
Gipatik sa mantalaang SuperBalita Cebu Hunyo 29, 2012.
Opinyon
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
