Editoryal: Pagdisiplina sa bata

NAPASAR na gyud ang ordinansahon sa Cebu City Council nga magsilot ni bisan kinsa, lakip na sa mga ginikanan, nga modapat sa mga bata sa ilang pagdisiplina. Duna kiniy dakong multa.

Dunay mga ginikanan nga ning-react dihang gituki pa ang maong ordinansa nga supak niini kay di maayo nga did-an sila sa pagpahamtang og pisikal nga silot sa ilang mga anak. Ilang nakita nga ang pisikal nga silot apil sa epektibong paagi sa pagtul-id sa bata.

Apan sa isyu sa Psychology Today niadtong September 1, 2001, ang panel sa mga psychologist nagkanayon nga ang kombinasyon sa diha-diha ug tukma nga pagpahalipay sa maayong buhat sa bata maoy labing maayong paagi sa pag-umol sa iyang pamatasan.

Matod sa panel, mas maayo ang non-violent nga pamaagi sa pagdisiplina sa bata, sama sa pagdili sa pagtan-aw og TV kon di makahimo sa assignment o homework.

Apan si Dr. Jay Belsky, sa September 25, 2008, issue sa Psychology Today, niingon nga mas maayo gyud nga pahalipayan ang bata sa maayong buhat. Ipahamtang lang ang silot kon grabe na kaayo ang kasal-anan.

Sa usa ka pagtuon, 90 porsyento sa mga pamilya naggamit sa lagpak nga usa sa mga pamaagi sa pagdisiplina sa bata. Apan ang risgo niini, matod sa mga pagtuon, ang bata modako nga dunay kasuko ug bayolente ug kon masobraan, kini mahimong child abuse.

Apan bisan unsa pa nga paagi sa pagdisiplina ang gamiton, kon ang ginikanan nagbuhat og dautan, magdako ang bata nga dautan usab. Kay ang bata giumol sa iyang palibot.