Nalzaro: Pagdisiplina sa mga bata

ADUNAY panultihon nga nagkanayon “ang bunal sa inahan ngadto sa iyang anak nagdala kini og pagpangga ug pagmahal.” Ang mga ginikanan nga modi­siplina pinaagi sa pagpasakit sa ilang mga anak adunay rason. Way boang nga mga ginikanan nga mobunal sa ilang mga anak kon walay nahimong dautang binuhatan ang ilang mga anak. Ug para nako epektibo ang pagpasakit gamay sa mga anak isip pamaagi sa pagdisiplina.

Kini base sa akong kasinatian. Si kinsa ba nato ang wala maka-agi og bunal ug silhig, tukog, bakus, sanga sa bayabas ug kagingking (uban gani ikog sa pagi) sa atong mga ginikanan. Unya pinaagi sa maong pagbunal, nadisiplina mo? Sa akong bahin, nadisiplina ko. Mao nga kuyawan na ko mohimo og dili maayong binuhatan kay kon mahibaw-an sa akong nanay o tatay, siguradong bunal o lusi sa dunggan o bugan ang sunod ana.

Pinaagi sa maong disiplina, nakamatngon ako nga sayop diay ang akong gihimo ug maoy nakapalig-on kanako.

NIADTONG BATA PA KITA

Niadtong bata pa ko, samtang magduwa-duwa kami sa akong mga higala, magsaka-saka sa punoan sa kahoy, kay taga probinsiya lagi ta, badlungon mi ni Nanay Doring. Ug kon dili mopatuo, gukdon mi ug pamunalan. Nakapangu­tana ako kaniadto nganong bunalan man ni ni Nanay nga nagduwa-duwa ra man mi. Dihang nahimo na akong amahan, diha na nako matubag ang maong pangutana.

Gipamunalan ming Nanay kay simbako mahagbong mi gikan sa taas sa kahoy unya mapiang, aw, siya gihapon ang magsakripisyo. Maayo kon mapiang lang, aw, kon mamatay di mawad-an sila og anak. Mao nga sa dihang gamay pa nang akong anak nga lalake, ako gyud nang liktan ug lusion ang dunggan, bunalan gamay (gamay lang) kon magpabadlong. Di lang pod palabian og bunal nga mo ra kag nagpatay og halas o bitin.

ORDINANSA

Kining ordinansa nga gipasar sa Konseho ning siyudad nga nagdili sa mga ginikanan, yaya, helper ug mga paryente ug guardians pagpasakit sa mga bata morag mawala na ang awtoridad sa mga ginikanan mismo nga modisiplina sa ilang mga anak. Silutan og pagkabilanggo ngadto sa unom ka buwan ug multa nga s P5,000 ang makalapas niini.

Para nako, gihatagan lang unta og exemption ang mga ginikanan. Unsa-on man pagdisiplina sa mga ginikanan na sa ilang mga anak? Ihunghong na lang ang ilang pangasaba? Mo-abusar ang mga bata niini.

(bobby.nalzaro@yahoo.com)