Durano: Way labot

DALI nga nakapamalibad ang Department of Justice (DOJ) nga wala sila’y labot ug wala usab sila’y tulubagon sa kamatayon sa laing importante unta kaayo nga testigo sa nahitabong Ampatuan Massacre niadtong Nobyembre 29, 2009 nga mikalas og 57 ka mga kinabuhi.

Maoy gipanghimug-atan ni Secretary Leila De Lima nga ang ila ra nga kayang proteksyunan mao kadtong mga boluntaryong mipasilong sa ilang Witness Protection Program og dili nila mahimong ipa­mugos ang ilang buhaton ug kaugalingon sa mga kontra-gusto nga matang sa mga testigos.

Sa nasayran nga gipatay na usab karong bag-o ang nailhang si Alijol Ampatuan unya kini ang midugang sa gidaghanon sa unom na ka mga gipangtumba gumikan sa pagkalambigit sa kontro­bersyal nga kaso.

Ning maong toll of casualties, tulo ang mga testigos unya ang laing tulo ang mga miyembro ug mga sakop ra sa banay nga gituohang gituyo sa pagbuhat aron sa pagtisok sa mensahe sa kahadlok sa uban nga dii na mo-kooperar kon dii gustong masugamak sa susamang kapadulngan.

Mitumaw ang pangalan ni Alijol niadtong milabayng tuig human ang kanhi militiaman nga si Esmael Amil Enog kinsa ang gipatay na usab ang mibutyag nga si Alijol ang mimando kaniya sa pagdala og 36 ka mga sakop sa lugar diin nahitabo ang massacre.

Seguradong dulom pa unya sa alketran ang kapadulngan ning maong kaso kun moabot na sa punto nga wala na unya’y mahibilin pa nga motestigos kay ang tanan, kon wala pa malubong ang nag-iyahay na usab sa pagpanago tungod sa kahadlok.

Unya ang gipakitang taras sa gobyerno sa pagpanghugas sa bisan unsang responsibilidad ang dili makatabang. Hinunua, kini ang maghaling pa sa pagsilaob sa kahadlok sa katawhan nga dili na mag-apil apil ug manginlabot sa kaso bisan og aduna pa sila’y kasayuran.

Dili mamahimong maghinan-aw lamang kita sa sitwasyon unya modayon sa pag-insistir nga wala kita’y mahimo. Imbis nga maoy atimanon ang pagpunay sa pangpanglimpyo sa ilang imahe mas maayo segurong mohimo na sa ilang obligasyon kining atong mga ahensiya ginamit ang mga kasangkapan ug pundo sa gobyerno.

Kay og magpunay na lamang sa pagpalusot nga wala sila’y labot, dili lamang unya ang kaso sa mga Ampatuan victims ang seguradong maala-ot kun dili lakip na ang kinatibuk-ang nasod nga Pilipinhon.