Editoryal: Paghikaw sa katungod

DI NATO ikalimod nga dunay mga bata nga masupi­lon. Buot ipasabot nga bisan og di gusto ang ilang mga ginikanan nga kini buhaton kay lagi makadaot, ang ila gyung gusto maoy tumanon.

Apan tungod kay ginikanan man lagi, ipatugbabaw gyud ang katungod sa pagdisiplina aron mahisubay ug mahitukma ang ilang mga anak sa saktong dalan.

Tuod man daghan ang nabulahan. Nakatilaw man tuod og kasaba, bunal, lusi sa dawunggan ug uban pa nga naghatag og panghimangno ngadto sa kabataan apan alang lang kini sa ilang kaayuhan ugma damlag.

“Istrikto man to akong papa ug mama, pero wa ko magbasol kay naingon ani ko ron, tungod sa ilang ka disiplinado,” matod pa sa usa ka batan-on nga bag-o lang naabogado.

Pero sa niaging adlaw, ang konseho sa Sugbo mipapasar og city ordinance nga daw sa nagpakgang sa mga ginikanan nga modisiplina sa ilang mga anak.

Sila si Konsehal Leah Japson, Alvin Dizon, Margot Osmeña ug John Philip Po II ang naggama sa maong ordinansahon.

Di na mahimo nimong kasab-an ang imong anak ug di na gani ka kalusi sa dawunggan niini kon makahimo og kasal-anan.

Sa laktod nga pagkasulti, gikuhaan og katungod ang mga ginikanan nga makapahamtang sa kaugali­ngon nilang pagdisiplina aron magiyahan ang ilang anak ngadto sa katarong ug tukmang dalan.

Kakuyaw og maaprobahan ni sa mayor kay tiaw mo bay pamultahon kag P5,000 ug mapriso ka’g unom ka buwan tungod sa pagdisiplina sa imong anak.

Kinsa guy ginikanan nga di gustong maprotehian ang mga bata, pero mora og sobra ra sab ni ila.

Unya og mapriso ang mga ginikanan, kinsa na may mobuhi sa ilang pamilya? Ang Konseho?
Kapait ning balaura.