Nadela: Ang pagbalik ni Jake

WALAY kabutangan ang kalipay nga gibati nila ni Rogelio ug Diana human mahibalik sa ilang kiliran ang ilang anak nga si Jake.

Upat ka adlaw nga nawala si Jake human dagita sa duha ka babaye sulod sa usa ka mall niadtong Lunes.

Sulod sa upat ka adlaw, saksi ko kon unsa kamasulob-on ang magtiayon ug unsa sab ka busy ang opisina ni C/Insp. Bonifacio Garciano pagpangita sa bata.

Bisan ako, nakuyog sa grupo sa mga pulis nga namaybay sa basakan sa Barangay Kaktot, Liloan sa pamasin nga makit-an ang bata.

Naabot pa mi sa sudlonon nga bahin sa Barangay Yati, apan walay Jake nga among nakita.

AMPO

Niadtong Martes sa usa ka adlaw humana dagita si Jake, nag-abot mi nila ni Rogelio ug Diana sa Cathedral diin sila nanagkot para kang Jake.

Ilang giampo nga mabalik na sa ilang kiliran ang bata.

Tuod man gahapon sa hapon wa hiilhing babaye ang niduol sa security guard sa Cathedral nga si Jay Daguman ug nanugon nga ibilin ang bata kay siya mosimba.

Wa mobalik ang babaye ug napugos si Jay pagpaalarma sa usa ka tuig nga bata.

Resulta nga ang gidagit diay nga si Jake ang maong bata. Sa Cathedral sila nag-ampo, ug sa Cathedral sab giuli ang ilang giampo.

PALMA

Gahapon sa buntag niadto sa Cathedral ang maglive-in ug si Jake aron personal nga pasalamatan si Jay, apan nakapauli na si Jay mao nga gihuwatan nalang nila si Bishop Jose Palma nga nagmisa. Wa gyud damha nga si Jake ug Bishop Palma magkakita. Giasoy ni Diana ang nahitabo ni Jake ngadto kang Palma. Gihagwa ni Palma nga pwerting nakaagik-ik og katawa.