Diola: Vicente Lim Jr.

Fr. Carmelo O. Diola, SSL
Mao Diay

Binasi sa Kaalam 1:13-15; 2:23-24; Salmo 29; 2 Korinto 8:7,9, 13-15; Marcos 5:21-43

“Ug miabot ang usa sa mga pangulo sa sinagoga nga ginganlag Jairo, ug sa pagkakita niya kang Jesus, mihapa siya sa Iyang tiilan ug nagpakiluoy pag-ayo sa pag-ingon, ‘Himalatyon ang akong anak nga babaye, adtoa intawon aron matapion nimo ang imong mga kamot kaniya aron siya maluwas ug mabuhi.’”

Gahapon nagmisa ako alang sa lubong sa usa ka tawo nga kaduha lang nako mahimamat. Nasuod man god nako ang iyang mga anak mao nga dihang mihalina ang ilang amahan ako ang ilang gihangyo nga momisa.

Si Vicente Lim Jr. mao ang ikatulong anak ni anhing Heneral Vicente Lim ang unang pangulo sa Philippine Constabulary kun PC. Mao kini ang gigikanan sa PNP kun Philippine National Police. Giila siya nga usa sa mga bayani sa Pilipinas panahon sa World War II.

Si Vicente Jr. kun Ting nagtungha usab, sama sa iyang amahan nga mao ang unang Pilipino nga migradwar dinhi, sa West Point Military Academy. Samtang didto siya sa tuig 1942 – kay ang ilang pamilya gipaeskapo man didto sa America panahon sa katapusang gubat – misulat siya og usa ka essay diin gihisgotan niya ang tambag sa iyang amahan mahitungod sa pagdala og mga sundalo. Kon buot sa usa ka lider nga magpabilin og “loyal” ug matinahuron ang iyang mga tawo, kinahanglan kuno nga ang lider “loyal” usab ug matinahuron sa iyang mga tawo.

Gipuy-an ang maong tambang sa iyang amahan kay didto sa Bataan nangita siya og 50 ka mga “volunteers” alang sa usa ka malisod nga misyon. Duha ka gatos ang miboluntaryo.

Si Ting gihatagan og “honorable discharge” sa West Point tungod kay nasakit man siya. Gipadayon niya og puyo ang iyang nakatonan sa iyang amahan. Gipuy-an usab niya ang mga hiyas sa iyang tunghaan: ang “duty, honor, and country.” Nakita kini sa iyang pagdala sa iyang banay, sa iyang trabaho sa Del Monte Company, sa iyang mga mga pagbulig sa katilingban, ug uban pa.

Sa atong ebanghelyo giduol si Jesus sa usa ka opisyal sa sinagoga, si Jairo, alang sa iyang suluguon nga hapit nang mamatay. Nagpakitabang kini kang Jesus. Miadto si Jesus apan patay na ang dalagita. Dili na unta siya paadtuon sa mga alalay ni Jairo apan wala panumbalinga ang ilang mga tingog. Miadto lang gihapon si Jesus ug gipagawas niya ang mga naghimatay. Nabuhig usab ang bata sa diha iya gikuptan ug gisultian nga mobarog.

Makatandog ang gihimo ni Jesus. Nakita niya ang kinasingkasing nga pagtagad ni Jairo ngadto sa iyang suluguon. Gihatagan niya kinig kinabuhi ug sigurado nga si Jairo, bisag wala na hisgoti sa ebanghelyo, nagmalipayon gayod.

Ang pagka-“loyal” ug pagtahod sa atong mga sakop ug sa mga ultimo gikinahanglan. Dili kini sila mga butang ang abusaduhon, sama pananglit sa mga “unfair labor practices” nga maoy nakapadato sa daghang mga negosyante.

Sa usa ka gisulat nga kolum ni Winnie Monsod, gihisgotan niya ang mga napulo nga labing sapian nga mga Pilipino. Misulat siya nga nalakip sa lista ang migamit og smuggling ug wala mohatag og insaktong suweldo sa ilang mga trabahante. Wala siyay gihisgotan nga ngalan. Si David Consunji lang ang iyang gihisgotan nga usa ka negosyante nga wala moabusar.

Makapalipay kini. Nadugangan akong kalipay kay si Vicente Jr. ug si Mr. Consjunji mga klasmets diay sa high school.