Editoryal: Gikinahanglang liderato

GIHISGUTAN atol sa Sustainable Cities Forum niadtong Biyernes sa hapon ang mga imprastraktura sa dakbayan sa Sugbo aron mopaluag sa dagan sa trapiko, mopasayon ug modasig sa mga tawo sa paglakaw, apil na sa persons with disabilities (PWD), ug pag-ehersisyo sama sa running ug biking.

Nahisgutan ang daan nga Metro Cebu Land Use and Transportation Study (Mcluts) nga gihimo niadto pa diayng 1981. Daghan sa mga rekomendasyon sa pagtuon ang wa mapatuman.

Pipila natuman sama sa Mandaue Reclamation Project, South Road Project ug South Bus Terminal. Ang naghimo sa pagtuon dunay suporta sa liderato kaniadto. Apan ang nakaparat karon kay ang pribadong sector man ang nangulo alang sa paghimong hamugaway nga puy-an sa Metro Cebu.

Tan-awa ang mga karsada sa Metro Cebu, nagkaguliyang lang. Paspas ang paglambo apan klaro kaayong wa makapangandam ang liderato sa mga dapit sa Metro Cebu sa economic development explosion.

Ang nakapait pa gyud, kay bisan nagkagubot ug nagkahuot ang Metro Cebu, ang mga pulitiko way hapit gihimo.

Busa, sa 2013 elections, mas maayong pilion ang liderato nga dunay panglantaw ug nagpakabana sa problema sa palibot.

Liderato nga di lang pagpangolekta sa kuwarta ang nahibaw-an. Liderato nga di lang pagpangaway ug pagpangita og kontra ang gitagad. Lideratong di madumtanon.

Kon di, pilion ang tawo nga dunay panglantaw alang sa unsay Sugbo ugma, nga mapuy-an sa katawhan nga hamugaway.