Mongaya: Mag-Liberal si Edigul?

INIT nga gihisgutan karon sa pipila ka mga pundok-pundok sa mga Liberal dinhi sa Sugbo mao ang posibleng paghurar ni Kong. Eddie Gullas isip bag-ong sakop sa partido karong Hulyo 7, 2012 sa Syudad sa Danao.

Gipaabot man gud nga moanhi si President Noynoy Aquino sa Sugbo ug moderitso sa Syudad sa Danao sa maong adlaw kay mao kini ang kasaulogan sa adlawng natawhan ni Bise Mayor Ramonito Durano.

Sa maong adlaw gitakda ang pormal nga paghiusa sa Bakud nga gipangulohan ni Durano ug ang Liberal Party dinhi sa Lalawigan sa Sugbo. Buot ipasabot, ang swing-vote sa miaging mga piliay

Ug resulta niini mao ang pormal nga paglusad sa kandidatora nilang Junjun Davide isip kandidato alang sa pagka gobernador ug Bise Gobernador Agnes Magpale.

Ang surpresa mao ang mga hisgot-hisgot nga sa mao sab nga okasyon mohurar si Gullas nga mao usab ang lider sa Alayon diri sab sa unang distrito sa Lalawigan sa Sugbo.

Kon tinuod ang maong istorya, makaingon kita nga dako-dako ang mapahak gikan sa One Cebu nga gipangulohan ni Gob. Gwen Garcia.

Si Garcia, nga modagan alang sa pagka senador ubos sa payong sa United Nationalist Alliance (UNA) nga usa ka alyansa sa PDP-Laban ni Bise Presidente Jojo Binay ug ang Partidong Masang Pilipino (PMP) ni kanhi presidente Joseph Estrada, gisaligan nga maka-deliver og dakong boto.

Apan bisan man og makibhangan ang balwarte sa One Cebu alang sa mga Garcia, nagtuo ko nga lahi sab ang epekto alang sa mga Cebuano kining panawagan nga angayang modaog si Gwen kay Cebuano kini.

Alang kanako daghang mga Cebuano nga bisan pag tua sa ubang mga partido nga mosuporta og laing Cebuano diha sa Senado.

Hinuon, sa baruganan nga angayang tabangan ang tanang mga kandidato alang sa Senado nga gikan sa Visayas ug Mindanao sama sa gibatunan sa akong blog nga politika2013.wordpress.com, di sab ingon niana pagkasayon.

Tungod man gud kini sa pagnagbangi nilang Migz Zubiri ug Sen. Koko Pimentel. Kahinumdoman, sa grabing pagpanikas didto sa Manguindanao sa miaging piliay sa 2007, niguwa nga nidaog diay si Koko ug ni-resign si Zubiri.

Karong bag-o, niluwat si Pimentel gikan sa UNA kay gidawat man sa grupo si Zubiri.

Kon ako ang pangutan-on, ato na lang tabangan ang duha aron mas modaghan ang mga Bisdak nga mga senador.

Naga

Sa miaging Biyernes, usa sa mga gidapit ni Mayor Val Chiong sa pag-inagurar sa bag-ong Enan Chiong Sports Complex mao si Sen. TG Guingona. Kuyog niya si Gob. Garcia ug Kong Eddie Gullas.

Alegre nga tapad kini. Ug sa kaalegre, nagtuo ko nga maglibog sab ang utok sa mayor labi na kon magka grabi ang bangi nilang Gob. Gwen ug Junjun.

Kay anak ako sa usa ka taga Naga, mapasigarbuhon sab ko kada tuig nga nga dunay subhan si Mayor Chiong nga proyekto.

Sa miaging tuig, gi-inagurahan ang expansion machine sa material recovery facility sa Syudad sa Naga aron ma-accommodate ang basura gikan sa Minglanilla.

Karong tuiga, nahuman ang Enan Chiong Sports Complex. Sunod tuig, nagkanayon si Mayor Val nga angayang inagurahan na sab ang iyang sunod nga proyekto nga mao ang modernong merkado sa Naga. Pagka swerte sa mga taga Naga.

(politika2013.wordpress.com)