Nalzaro: CHR way ayo

GI-IMBESTIGAR gyud diay sa Commission on Human Rights (CHR 7) ang pagpusil-patay ni PO2 Lea Juarez kang Rayl Alex Cabornay human kini manulis og usa ka babaye sa Ayala Business Park niadtong Hunyo 7. Gi-ugkat ang patay’ng lawas ni Cabornay gikan sa gilubngan niini sa Calamba cemetery niadtong miaging adlaw ug gipahigayon ang autopsy. Si Dr. Rene Cam, ang medico-legal officer sa National Bureau of Investigation (NBI 7), ang mipahigayon sa autopsy.

Ang CHR mihimo og imbestigasyon tungod sa hangyo sa mga kabanay sa maong giingong tulisan gumikan sa ilang nakuhang inpormasyon nga posibling gipusil sa makadaghan ni Juarez ang 17 anyos nga tulisan. Unya adunay mga taho nga dili kuno armado ang napatay. Nganong naghukas na kuno ang biktima sa dihang gidala sa punerarya.

VERSION

Aw, ila usab nang version sa mga kabanay. Dili usab kita makabasol kanila kay bisan unsa pa ang background sa maong napatay mangita man gyud sila kunuhay og hustisya. Apan sa dili pa unta mohimo og bisan unsang imbestigayson ang CHR, ila pod unta nga huna-hunaon ang kinatibuk-an nga situwasyon ug dili lang sila mo- focus sa pagpusil ni Juarez ngadto kang Cabornay.

Kon ang mga kabanay ni Cabornay nakabadlong pa unta sa namatay, aw, dili na unta to siya manulis ug dili unta mapatay. Nanulis ang maong tawo uban ang ig-agaw niini. Unya nahitabo ang ginukdanay tali sa mga suspetsado ug ni Juarez ingon man sa kaubang pulis niini nga si PO1 Percival Perigo. Sa dihang na-corner na ang mga suspetsado doul sa Kapitolyo, mibunot kini sa iyang armas. Mao nga gi-unhan ni Juarez. Kon misurender pa unta to si Cabornay, dili unta kadto mapusilan ni Juarez. Unsa may gustong mahitabo sa taga CHR nga magpatara lang usab si Juarez?

DEMORALIZE

Kining gihimo sa taga CHR makapa-demoralize kini sa atong kapulisan. Diay mga pulis nga nagtinarong sa pagserbisyo pinaagi sa pagtubag sa katungdanan, ila hinuon nga ipiton ug lisud-lisuron. Asa man sila maninaw, sa mga kabanay sa tulisan, o sa awtoridad. Alang kanako walay nalapas nga tawhanong katungod si Juarez ug dili ni angay imbestigahon. Pagkaway ayo ining CHR.

Kon wala nay laing mahimo kining taga CHR, mas maayo pa siguro moadto ni sila sa bukid ug adto mangimbistigar sa mga yanong mga tawo nga gidaog-daog sa mga pulitiko ug militar. O ba kaha pakita lang ning ila aron ingnon nga naa silay trabaho.

(bobby.nalzaro@yahoo.com)