Banoc: Latos sa ginikanan

GISAWAY ni Cebu City Mayor Michael Rama ang napalabang nga ordinansahon sa konseho nga nagdili na sa corporal punishment ngadto sa mga bata.

Atol sa iyang State of the City Address (Soca) sa miaging Lunes, gihulagway ni Rama ang mao nga ordinansahon nga anti-poor gumikan kay daghan na unyang mga kabos nga mga ginikanan nga mapriso kay nagdisiplina sa ilang anak.

Makiangayon nga pagkasubay, maayo man ang tumong sa konseho sa mao nga ordinansahon gumikan kay nanalipod kini sa katungod sa mga bata batok sa pagpang-abuso gikan sa ilang mga ginikanan, magtutudlo, mga yaya ug sa mga nagbantay kanila.

Si Konsehal Leah Japson, usa sa mga nagpanday sa mao nga ordinansahon akong nahinabi sa akong programa Straight to the Point sa dyHP.

Matod ni Japson nga dili na kinahanglan nga imong pasakitan sa iyang pisikal o pakauwawan ug istorya ang bata aron kini makakat-on sa iyang sayop.

Sumala ni Japson nga positive discipline ang gikinahanglan pinaagi sa bugnaw nga istorya ngadto sa bata aron makaamgo siya sa iyang sayop.

Mao sab kini ang baruganan sa nailang sikolohista sa Sugbo nga si Dr. Obra, ang hepe sa Center for Behavioral Sciences sa Vicente Sotto Memorial Medical Center (VSMMC).

Matod ni Obra nga dili na kinahanglang latuson o kasab-an ang bata atubangan sa daghang mga tawo.

Nipasabot si Obra nga ang bata nga sigihan ug latos mabunol hinuon ug dili na epektibo kaniya ang latos aron makakat-on sa iyang sayop.

Samtang mas sakit pa sa bonal ang kasaba atubangan sa daghang tawo ngadto sa bata. Gumikan niini, mahimong dad-on sa bata ang iyang pagdumot sa iyang ginikanan hangtod sa iyang pagdako.

Sumala ni Obra nga mahimong disiplinahon ang bata sama pananglitan nga isuspenso ang iyang pagtan-aw sa telebisyon o dili dad-on sa pagpanuroy kon makasala.

Sa pikas bahin, nahimo nang kabahin sa kultura dili lang natong mga Pinoy apan apil na sa ubang mga nasud ang paglatos sa bata kon makasala.

Dunay kalainan ug ang magtutudlo, yaya, guardians o ang tagbantay ang molatos sa bata kay sa latos sa ginikanan.

Kini kay posibleng ang latos sa laing tawo gumikan sa kasuko apan ang latos sa ginikanan gumikan sa iyang pagmahal ngadto sa anak aron makaamgo sa iyang sayop.
Lahi sab ang latos sa ginikanan nga gamitan og binugha ngadto sa ulo sa bata ug ang latos nga usa ka gamayng sanga sa bayabas.

Naa man sab goy ubang ginikanan nga daw makalatos ug bitin ngadto sa ilang anak. Dili na pod ko uyon sa ingon ana. Apan siguro, igo-igo lang nga latos dako ni ug matabang aron mabut-an ang bata.

“Kadtong naghawid sa iyang bonal nagdumot sa iyang anak. Apan kadtong nahigugma kaniya mokastigo sa panahon nga makasala” (Proberbiyo 13:24).