Editoryal: Panaghigala?

GIOBSERBAR karon ang Philippine-American Frien­ship Day nga gideklarar ni kanhi Presidente Diosdado P. Macapagal aron pagtimaan sa pagdaug sa hiniusang pwersa sa tropang Pinoy ug Amerikano batok sa mga Hapon nga nagtapos sa Ikaduhang Gubat sa Kalibotan.

Ang Pilipinas nahimong kabahin sa teritoryo sa Estados Unidos gikan sa 1898 ngadto sa 1941, diin ang puwersa sa Japan niokupar apan nabawi og balik sa mga Amerikano human sa hamubo nga gubat.

Niadto, ang Independence Day o Araw ng Kalayaan sa Pilipinas gisaulog matag Hulyo 4.

Apan gibalhin ni kanhi Presidente Macapagal ngadto sa Hunyo 12, ang adlaw niadtong tuig 1898 diin si Emilio Aguinaldo, unang presidente sa republika, nideklarar sa independensya gikan sa Espanya.

Busa, si kanhi Presidente Macapagal nideklarar sa Hulyo 4 isip Philippine-American Friendship Day, tukma sa Independence Day sa Estados Unidos.

Karong adlawa haom sa pagsubay sa nagdugtong nga giingong panaghigalaay sa Pilipinas ug Estados Unidos human ang mga Filipino lunod-patay ug inosenteng nakig-abin sa mga Amerikano sa Ikaduhang Gubat sa Kalibotan.

Apan human sa gubat ug hangtod karon, ang mga kondisyon sa managhigala mipatigbabaw ba sa relasyon tali sa Pilipinas ug Amerika?

Subo nga pamalandungon, ang mga Filipino nga gerilya layo kaayo og benepisyo sa mga beteranong Amerikano, bisan ang nahiuna nakig-away sa gubat nga dili para sa ilang interes ug sa yutang natawhan.

Ug ang pagpakigbisog sa ilang benepisyo sa nagkagamayng mga beteranong Pinoy sa Estados Unidos nagpadayon pa. Unya tugoti kon mapuo na?

Sa natad sa ekonomiya ug pulitika, ang Pilipinas abli sa pagsulod-gawas sa pamatigayon apan higpit ang ‘proteksyon’ sa Amerika. Bisan ang pagkuha og visa, sama sa kontra ang ilang pag-atiman kanato.