Lariosa: Prayer warriors

Sila ang mga sundawo sa pagtuo o mga prayer warriors sa pinulongang Ingles. Kon kinahanglan anaa sila sa bisan asa motabang sa pag-ampo aron ang masakiton kahatagag paglaom pinaagi sa pagsangpit sa kahitas-an.

Sa among barangay sila ang mga “dawn rosarians” nga di mopalta matag kaadlawon mangaliya ug manag-awit su­bay sa kadalanan sa dapit. Ang ilang tingog mosiak sa kahilom ug katugnaw sa kaadlawon lagbas sa kasingkasing niadtong nakadungog.

Kinsay di matandog sa ilang pangaliya ug awit nga buhong man sa kamatinud-anon nga pagsangpit sa kaluoy sa langit. Bisan unsay imong relihiyon makahinuktok ka sa kalunsay sa ilang pagtuo sa Diyos.

Sila mga yanong lumolupyo sa barangay nga way mga materyal nga mga butang nga ikapasigarbo. Sa pakighinabi ning maglilindog sa usa ka sundawo kini namulong nga ang iyang gipangayo mao ra gyud ang kalinaw sa ilang pagpuyo lakip sa minyo nyang mga anak.

Ang laing sundawo nitug-an nga ang iya usa ka pasalamat nga nahimong malampuson ang iyang mga anak nga karon aduna nay kaugalingong mga pamilya. Dugay na siyang nahimong dawn rosarian.

Nahinuklog k o sa ilang gisulti kay tin-aw man sa Bibliya: “In all thy ways recognize Him, and He shall direct thy path (Proverbs 3:6). Sa atong pinulongan: Sa tanang paagi hangpa siya ug ikaw Iyang tultolan sa imong padulngan.

Nahinumdom ko sa dekada ’80 sakop ko sa maong pundok. Ang di nako makalimtan mao kadtong akong pagdala sa rebulto sa Birhen gikan sa amo ngadto sa iibabaw nga bahin sa among barangay diin didto ang panimalay nga modawat sa Birhen
Kalit nga nibundak ang uwan nagkahumod ko lakip ang uban gawas niadtong nagdalag payong. Pun-an sa kabugnaw sa kaadlawon naingon kog kuayabog sa langgam nga nagkurog apan nakalahutay ko tungod sa pagtuo.

Maoy pagtuo sa akong mga kauban nga mahilantan ko hasta pud ang akong asawa. Apan wa kini nahitabo. Niadto nisamot ang akong pagtuo nga gipanalipdan ko sa mahal nga Birhen nga akong gikugos.

Dugay na to nga ang grupo naundang. Ang ka­daghanan sa akong mga kauban ninghalin na sa laing kalibutan. Ang dawn rosarians sa among barangay inanayng nabanhaw hangtod karon madasigon pa gihapon ug tugob sa katigson.

Di na ko sakop, apan inigkadungog ko sa ilang awit ako mahigmata sa hingpit aron sugaton ang kapiskay sa kaadlawon sa akong pangaliya nga unta sila hatagan pag taas nga kinabuhi pagmatuto sa kamatinud-anon sa ilang katuyoan.

Sayri Kini. Tinuod ning taho nga giyak-an og dakong pulitiko sa habagatang distrito ang DepEd Province. Di kuno makakuhag item ang di niya tawo kay babagan. This is totally unfair and absurd! Ang pangutana nganong pagamit ang division superintendent o regional director sa maong pulitiko? Angay ning isumbong sa itaas.