Lonzon: PJ Garcia mapahiubsanon

BISA’G wa girespito ug giyatakan na sa kadagkoan sa Barug alang sa Kauswagan ug Demokrasya (Bakud Party), pabi­ling nagpaubos ug kalmado si Kongresista Pablo John Garcia. Ug kini mao sab ang atong makita sa iyang pagkatawo mao nga gipangga kini sa mga mayor, board member ug mga kapitan.

Igo ra gyud nga miingon ang spokesman ug umaabot nga kandidato sa One Cebu Party sa pagka gobernador sa Sugbo, wa siya mahiubos ug masuko sa nakab-ot nga hukom sa Bakud nga gipangunahan ni Danao City Vice Mayor Ramonito Durano, sa pakig alyansa niini sa Liberal Party.

Buot nato sabton nga wa mahulga ang kandidatora ni Garcia sa tandem ni JunJun Davide ug Agnes Magpale, ubos sa Liberal Party nga maoy ilang kaatbang sa umaabot nga 2013 mid-term elections.

Tungod sab tingale kay umaabot man nga mahimong alyansa sa One Cebu ang mayor sa siyudad sa Danao, Boy Durano. Gawas kang Boy makauban sab niini si Kanhi Danao City
Mayor Don Durano nga mas lig-on pa ni Ramonito ug uban pang mga mayor ug kongresista.

Sa panag-engkuwentro ni Nito ug Don alang sa pagkamayor-wa gyud makasuway og daog si
Nito sa Danao City proper. Kamatuoran niini si Don maoy barangay kapitan sa Poblacion.

Karon nga naghugpong si Don ug Boy, maglisud si Nito sa maong siyudad nga maoy labing daghan og botante sa maong distrito.

Apan ang gipaabot kun si kinsa ang mamahimong runningmate ni PJ alang sa pagka bise gobernador. Mitumaw ang mga pangan nila ni Glenn Soco, PB Teddy Ouano ug pamilyang Durano sa habig ni Boy ug Don.

Apan mas bug-at ang pangan ni Ouano, nga nakabasi sa ikaunom nga distrito partikolarmente sa siyudad sa Mandaue nga maoy iyang balwarte. Mao ni atong paabuton kay taas pa ang panahon.

BAKUD DI MADAWAT SA LP?

Kon ang mga tigpaluyo sa Liberal Party ang pasultion, dili makapasar sa kuwalipikasyon ang Barug alang sa Kauswagan ug Demokrasya (Bakud) aron mahimong alyansa sa LP ni Presidente Noynoy Aquino.

Una, nanghilam-os sa kontrobersya ang Bakud sukad pa kaniadto nga mga eleksyon ug hangtud karon. Diba napriso man gani si kanhi Presidente Gloria Macapagal-Arroyo, kauban ang mga kanhi dagkong opisyal sa Comelec tungod sa panikas?

Nanggawas ang mga balita may labot sa dagdag-bawas, makabotar ang dili na botante kay dugay nang namatay, madugangan ang mga pangan nga dili sakop sa ilang pamilya ug ang pasangil sa pagpangharas.

Mao gani nga ang mga kontra ni Danao City Vice Mayor Ramonito Durano, nga maoy pango sa Bakud, nga nakabasi sa ika-limang distrito sa lalawigan sa Sugbo, dunay kaugalingong meaning. Ginganlan nila ang Bakud ug Barug alang sa kaugalingon sa mga Durano.

Apan mabasol niining tanan ang kadagkoan sa LP dinhi sa Sugbo, nga way klarong paghashas. Hinoon naprobar na nga way maayong liderato si Jun- Jun Davide, nga maoy provincial chairman nga miresulta sa panag-away sa ilang grupo.