Barrita: Parental authority

NAG-ASOD ang mga text ug email nga atong nadawat gikan sa mga ginikanan mahitungod sa bag-ong gipasar nga ordinansa sa konseho sa syudad sa Sugbo nga nagdili sa corporal punishment ug ingon man sa tanang matang sa physical ug verbal abuse.

Ang problema sa mga ginikanan mao nga samtang daghang gidili sama sa pagbunal ug paglatos sa usa ka bata, pagpakauwaw kaniya atubangan sa ubang mga bata ug sa publiko, ang ordinansa wa maglatid unsay tukmang paagi sa pagdisiplina sa usa ka bata.

Angay natong masayran nga ang pagdisiplina sa usa ka bata usa sa mga katungdanan nga gisangon ngadto sa mga ginikanan.

Hinuon, si Cebu City Mayor Mike Rama namahayag na nga di niya aprobahan ang maong ordinansa pinaagi sa paggamit sa iyang veto power.

Sumala sa balaod, ilabi na sa Family Code of the Philippines, ang parental authority gihatag ngadto sa mga ginikanan sa usa ka bata.

Ang Art. 220 sa maong balaod naglista sa mga katungod ug katungdanan sa mga ginikanan nga adunay parental authority sa ilang anak.

Naglakip kini sa pag-uban, pagsuporta, pag-edukar sa bata sa unsay matarong ug pinaagi sa maayong ehemplo ug pagmatuto ug pagpadako sa bata subay sa maabot sa ilang bulsa.

Lakip isip niini sa pag-amuma ug paghigugma sa bata, paghatag og maayong tambag ug
pagsabot kaniya.

Obligasyon usab sa ginikanan ang paghatag sa ilang anak og moral and spiritual guidance aron sila mamahimong matinud-anon ug ligdong, adunay self-discipline, self-reliance, kugihan, di gastador ug mahimong interesado sa mga katilingbanong kalihokan ug motuman sa katungdanan sa usa ka maayong citizen.

Gawas pa niining, gikinahanglan nga ang mga ginikanan mohatag sa ilang anak sa mga maayong basahon, mga maayong paagi sa paglingaw-lingaw ug pakighugoy-hugoy sa mga maayong tawo ug pagpanalipod sa ilang anak gikan sa mga daotang tawo ug aron di makat-on sa daotang mga kinaiya nga makadaot sa ilang panglawas, pagtuon ug moralidad.

Kinahanglan nga modemanda ang mga ginikanan og pagtahod ug pagkamasunuron gikan sa ilang anak. Ug ang labing mahinungdanon mao ang pagdisiplina sa ilang mga anak kon
gikinahanglan.

Nganong gikinahanglan man nga disiplinahon ang anak?

Sumala sa Art. 221 sa family Code, Parents and other persons exercising parental authority shall be civilly liable for the injuries and damages caused by the acts or omissions of their unemancipated children living in their company and under their parental authority subject to the appropriate defenses provided by law.

Kon makasala ang ilang anak, dunay tulobagong sibil ang mga ginikanan.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)

(Sa mga reaksyon kang Atty. Eddie O. Barrita: E-mail: edbarrita@yahoo.com; Cell # 09165805285; Room 201, 18 Cherry Court Bldg., Gen. Maxilom Ave., Cebu City)