Durano: ‘Condom-nation’

MOGAHIN og P500 mil­yunes ang Department of Health alang sa pagpamalit og condom nga libreng ipang­hatag sa mga Pilipino ubos sa pagtoo nga kini mao ang pinakasayon nga pamaagi sa pagkontrolar sa populasyon ug usa sa pinaka-epektibo nga proteksyon sa tanang matang sa mga sexually transmitted diseases.

Pinasubay man gud sa pagtoon sa DOH ug sa National Statistics Office, ilang nakita og napamatud-an ang direktang relasyon sa kakabus ug sa gidaghanon sa mga anak sa atong nasud.

Diin ang mga adunahan og middle class ang menos da ang gidaghanon sa mga anak apan ang mga kabus gyud nga klaro nga walay ensaktong kakuhaan sa kapanginabuhian ang puwerteng daghana og mga anak.

Ang makapabalaka kay kining maong mga kabataan nga nahimugso sa mga kabus nga pamilya duha ra gyud ka kahimtang sa kinabuhi ang sagad nga dangatan: (1) ang mapasagdan sa ilang batakang mga panginahanglan; (2) biktima sa eksplowitasyun ug pagpangabuso.

Sa mao nga hinungdan nga dali kaayong nakita sa report sa International Labor Organization ang pagsulbong sa child labor dinhi sa Pilipinas. Diin kun adto ka sa mga rural areas, ang mga anak ang gipaka-kabaw sa umahan unya sa mga urban centers, ang nahisum-ok intawon sa bisan unsa nalang nga trabaho.

Samtang maayo ang tumong sa Aquino Administration ning mao nilang programa ubos sa DOH apan angayan seguro natong makat-unan nga ang kausaban ug kalambuan sa usa ka nasud wala makasukad sa sayon og simple lamang nga pagpaghatag.

Bisan og ipangbitay pa nato ang tanang matang sa condom nga adunay nagkadaiyang flavors sa kalsada aron nga sayon ug dali kaayo kining mahulbot sa atong mga kaigsoon, apan hangtud nga wala’y pagsabot nga ang buhat sa pakighilawas gi-ubanan sa responsibilidad sa pag establisar ug usa ka pamilya nga maoy pundasyon sa atong katilingban, mahulog ra gihapon nga wala’y nada kining maong dako kaayong kantidad nga gigahin karun sa atong kagamhanan alang sa pagpangompra og condom.

Ang sayun og epektibo unta nga matang sa di­siplina mao ang pagsilot sa mga iresponsableng mga ginikanan ug ang pagbawi sa estado sa mga batang wala gi-atiman.

Ning maong prinsipyo sa pagsilsil sa responsibilidad ako nagatoo nga may esperansa pa nga ang atong problema ang tinud-anay da nga masulbad kaysa maoy hatagan og prayoridad ang programa sa limos ug dawat limpyo nga mentalidad.