Editoryal: Epekto sa pulitika

MI-BOYCOTT man tuod sa State of the City Address (Soca) ni Mayor Mike Rama ang mga kaalyado ni south district Rep. Tomas Osmeña sa Konseho sa dakbayan sa Sugbo uban ni Vice-Mayor Joy Augustos Young, apan wa kini magpasabot nga wa nila panumbalinga ang mga gipangbutyag sa mayor ngadto sa publiko atol sa Soca niini niadtong Lunes sa hapon.

Labing siguro, kasagaran kanila naminaw sa radio, o nitan-aw sa telebisyon o kaha namasa sa mga mantalaan aron mahibaw-an kon unsay mga gipanghisgutan ni Rama atubangan sa gatusan ka mga tawo nga nitambong sa maong kalihukan.

Mahimong ang katuyoan sa ilang pag-boycott mao ang pagpadayag ngadto sa publiko nga wa sila mosuporta sa mayor ug sa mga kalihukan niini.

Ang Soca ni Rama niadtong Lunes maoy nag­hatag kaniya og igong kahigayonan aron mapahibawo ang publiko kon unsay iyang nahimo nga mga proyekto sulod sa duha na katuig niyang pagdumala sa dakbayan.

Di ikalimod nga taliwala sa mga pagbabag ug pag-alkontra sa konseho nga gidominar sa mga kaalyado sa kaatbang niya sa pulitika, ubay-ubay usab og mga proyekto nga napakita ug nahimo si Rama nga gani wa mahimo kaniadtong mayor pa si Osmeña.

Mga basic services, infrastructure projects sama sa pagpang-aspalto sa kadalanan, pagpadako sa mga kanal maoy pipila sa mga prayoridad ning administrasyona.

Pero ang paghuman ning maong mga proyektoha magdepende lang usab kini sa resulta sa piniliay sa sunod tuig.

Mahuman kon hatagan sa katawhan og laing mandato si Rama apan kini namilegro kon ang makalingkod mao ang higpit niyang kontra sa pulitika.