Nalzaro: Buhong ang mgasenior citizens

DILI ako supak sa paghatag og financial assistance ngadto sa mga senior citizens.

Anga­yan lamang nga hatagan nato sila og hinabang gumikan kay natisalop na ang ilang mga kinabuhi ug wala na silay tinong income gumikan kay kadagahanan kanila mga retirado na. Ang uban gihatagan man gani og suporta sa ilang mga anak apan dili pa kining sarang nga magamit kanila sa ilang medisina kadaghanan mga maintenance medicines ug sa ilang personal nga panginahanglan.

Usbon nako ha, dili ako supak sa financial assistance. Apan ang nahitabo karon dinhi sa dakbayan sa Sugbo morag nahimo naman god ning pulitika. Morag nahulog nga bidding na ba tali nila ni Mayor Mike Rama ug sa iyang kaatbang nga si South District congressman Tomas Osmena nga mobalik pagpapili pagka-mayor sa sunod tuig nga piniliay.

Atol sa State of the City Address (Soca) ni Mayor Rama iyang gibutyag nga sa sunod tuig mamahimong P10 mil na ang dawaton nga hinabang alang sa mga senior citizens gikan sa pagkakaron nga P7 mil lang. Ug kon masubli-an siya sa pagkapili sa 2013 elections, iya na kining himoon ng P12 mil.

PALABWANAY

Ang nahitabo diay nga nagpalabwanay kini sila si Mike ug Tomas. Kay sa mga pulong-pulong ni Tomas, misaad diay usab kini sa mga senior citizens nga kon makalingkod siya pagbalik sa City Hall, iya usab nga himoon kining 10 mil ang iyang hinabang. Aw, kay nakadungog man si Mike, iya nang gihimong P10 mil daan. Siya goy naghupot sa renda sa pangagamhanan. Ang kang Tomas saad pa, iya gibuhat na. Abtik gyud si Mike.

Pero maayo kaha kini nga gigamit sa pamulitika ang kuwarta sa panudlanan sa dakbayan aron lang pagbuhong sa usa ka sektor? Alang nako, igo na kadtong P5 o P7 mil. Kay dili lang baya mga senior citizens ang nanginahanglan og tabang. Ang mga persons with disability (PWD) o kining mga disable diay. Dili ba mas nagkinahanglan kini silang panabang gumikan sa kahimtang sa ilang panglawas? Bisan kon datu ang lokal nga kagamhanan apan aduna pa kitay mga proyekto nga angayan hatagan og pagtagad nga diin makabenepisyo ang kinabag-ang duot sa katawhan.
Sige lang ta og hinabang ani.

SCREENING

Unya ra ba medyo gi-relax karon ang screening aning mga senior citizens. Pangitaan lamang sila og residence certificate o ba kaha certification gikan sa barangay captain. Aw, dali ra kaayo ang palusot niini. Ang mahitabo niini nga ang mga taga probensiya manganhi sa dakbyan kay dad-on sa ilang mga anak nga ania manimuyo o manarbaho dinhi, unya iparehistro lang aron makakobra. Apan atoa diay nagpuyo sa probensiya. Bida ning pulitika no, gusto lipayon ang tanan pinaagi sa pagpanghatag o pinalitay.

(bobby.nalzaro@yahoo.com)Sent from my iPad)