Nalzaro: Di mopahuway sa pulitika

KON napasar pa unta ang anti-dynasty law, usa ra unta ang modagan sa usa ka pamilya sa usa ka lugar. Usa ra unta ang modagan sa mga Garcia, Gullas, Radaza, Durano ug nga Martinez. Dili unta puwede ang bana ug asawa, anak ug amahan o inahan ang magdungan og dagan. Karon sila-sila lang ang magbuot-buot. Hangtod moginhawa pa kining mga pulitiko, dili gyud ni sila mamahuway. Sama niining Kong. Eduardo Gullas. Human sa pagkakongresista, magmayor na pod sa Talisay City. Unya mobalik na pod ni sa pagkakongresista kon kaya pa sa lawas. Pero ang baga gyud og nawong mao si Konsehal Agustus Pe Jr. Gikan sa north district, mobalhin na usab sa south. Nahigam si Jun Pe sa pulitika diin siya nadatu.

BALAOD

Anaa sa atong 1987 Constitution ang kabahin sa political dynasty, Section 26, Article 11; ‘The State shall guarantee equal access to opportunities for public office, and prohibit political dynasties as maybe defined by law.’ Ang Kongreso maoy gitahasan sa pagpasar og balaod kabahin niini. Aduna nay mga pending nga mga balaudnon kabahin sa anti-political dynasty.

Apan hangtod karon wala pa gyud matandog o gustong motandog nianang maong balaudnon kay siguro ko nga kon mapasar man kana, ma-igo sa tari ang mga pulitiko. Sa survey nga gihimo sa Kongreso, halos 70 porsiyento ang gikan sa political families bisan pa man sa pagtumaw niining mga partylist groups. Buot ipasabot nga ang nanglingkod karon mga kabanay ra gihapon sa mga kanhi kongresista nga maoy misunod kanila.

GIDID-AN NA

Sa version ni Sen. Meriam Defensor Santiago, did-an ang magpamilya nga mosulod sa pulitika sa usa ka lugar. Gikinahanglan nga usa ra gyud ang modagan. Unya gidili nga mosunod ang anak o asawa inig katapus sa termino sa amahan ug bana. Buot ipasabot, usa ra gyud nga sakop sa pamilya ang magpapili nga susama og apelyido.

Kon napasar pa ang anti-dynasty law, dili na unta magbalik-balik kining mga pulitiko ug mopahuway na unta ang uban human matapos na ang ilang termino. Karon magpa-ilin-ilin lang ning mga pulitiko kon unsa ang posisyon nga ilang daganan. Wala gyoy dag-anan ang mga bag-ong sulbong sa pulitika kay giyak -an sa mga beteranong pulitiko ang ilang distrito o lugar. (bobby.nalzaro@yahoo.com)