Nadela: Sungog sa panahon

PAGKAHUMAN gyud sa kalihukan sa Sinulog daghan sa mga taxi driver ang nagreklamo sa kahinay sa sakay. Dag­han ang nakahukom sa pagpahulay. Ang ubang taxi driver nipauli sa probinsya ug nananum. Ang uban nisud og laing trabaho. Ang labing daghan nagpabilin sa pagkupot sa ma­nobela sa ilang taxi may pasahero man o wala. Karon laing bagulbol na sab ang akong nabati ug sa akong analisar balido ang ilang gitug-an nako nga kaihit sa kita sa panaksi karon. Makaingon ko nga balido tungod sa klaro ug tataw kaayo nga kahimtang sa atong kadalanan nga dako kaayo og epekto sa ilang kinitaan. Unsaon man tuod nimo pag ginansya og dako kong ang ang karsada di motugot sa imong gusto. Ang buot nakong ipasabot, kondisyon ang imong taxi unit, apan ang karsada nagmug-ot tu­ngod sa kahuot. Angay sab sigurong masayod ang mga sumasakay nga panahon nga kamo naglingkod na sa taxi, way laing gihunahuna ang driver, nga ikaw mahatod sa hapsay ug luwas nga byahe. Apan kinahanglan sab nga maabot ka og temprano sa imong distinasyon aron nga sila makapasakay na sab og laing pasahero. Apan kong sa imong rota di na halos makalihok ang taxi tungod sa kahinay sa bul-og sa trapiko, alang sa taxi driver nga imong gisakyan usa ni sa dako niya nga kalbaryo. Di pa-igo kanang hinagtok sa metro bisan kong kamo nagpundo, kay ang angayan gyud unta magdagan kanunay ang taxi aron mahatod ka sa imong padulngan. Matod sa taxi driver nga akong nahinabi gahapon sa buntag sa painitan sa Fuente Osmeña Rotunda, nakapasahero siya padung sa Mandaue gikan sa Fuente alas kuatro sa hapon. Kay adlaw nga tingklase iyaha untang hangyuon ang pasahero nga molihay sila sa Mango Avenue. Apan niinsister ang pasahero kay hapiton pa niya ang iyang anak nga nagtungha sa Boys High sa may Mango. Sa gipaabot nang daan nasangit gyud sila kay naatol nga namuhi na sab ang mga bata sa mga eskwelahan nga naglumbay sa maong karsada. Puerting dugaya nila naabot sa Mandaue ug hilabihan kagamay ra gyud sa iyang nabawon human siya naka grahe pagka ugma. Ang iyang pasangil, ning panahon nga grabe ang problema sa trapiko, apektado ang kinitaan nila nga nag agad lang sa metro. Uyon ko sa maong pasangil ug gikinahanglan nga seryosohon kini pagsulbad sa atong gobyerno.