Editoryal: Debate

ANG pagpangga maoy labing dako kaayong gasa sa ginikanan nga iyang mahatag ngadto sa iyang anak. Dunay mga ginikanan nga modisiplina sa ilang mga anak ginamit ang corporal punishment nga ilang giingon nga maoy paagi nila sa pagpakita sa ilang pagpangga.

Gidebatihan pa gihapon ang ordinansa batok sa corporal punishment, kon makaayo ba kini o di sa mga bata.

Sa usa ka meta-analysis sa 88 ka mga pagtuon, si American psychologist Elizabeth Thompson Gershoff sa National Center for Children in Poverty sa Colombia University nisusi sa maayo ug negatibong epekto sa corporal punishment ngadto sa mga bata.

Ang maayong epekto mao nga ang bata dali kaayong motuman sa mga sugo ug mando.

Usa sa mga negatibong epekto mao ang pangabuso sa mga ginikanan ngadto sa ilang mga anak. Kon malab-anan sa pagdapat, ang mga bata mahimong agresibo, daling makakita og away ug dunay anti-social nga mga buhat sama sa pakig-inom sa kadalanan, abuso sa drugas ug uban pa.

Giklaro hinuon ni Gershoff nga di tanang mga bata nagpakita og di maayong lihok ug batasan tungod sa corporal punishment. Kay duna say laing mga aspeto nga konsiderahon sama sa relasyon sa ginikanan ug anak, kanunay bang nanagmal ang ginikanan ug kagrabe sa pagpanapat.

Kini nagpasabot nga ang epekto niini ngadto sa personalidad sa bata nagdepende sa kagrabe sa pagsilot. Kay duna bayay mga ginikanan nga kuwang na lang patyon ang mga bata.