Espinoza: Malagpot si Mayor Rama sa LP?

AGAD LANG. Ang atong mga pulitiko karon mora na og som. Kon asa ang kamay o tam-is tua magpunsisok. Tungod kay ang Liberal Party (LP), ang partido ni Presidente Noy Aquino mao’y naa sa poder, di kalikayan nga daghan ang mopasilong sa LP karon.

Matud pa sa komedya, ang atong mga pulitiko karon nag-agad lang sa presyo sa kopras.

Niadtong Sabado, ang Bakud Party ni Danao City Bise Mayor Nito Durano, sa kinto distrito, nakig-alayon sa LP. Si Presidente Aquino ang nangunay og pirma sa kasabutan didto sa dakbayan sa Danao.

Matod pa sa taho, daghang sakop sa One Cebu Party ni Gov. Gwen Garcia ang nakit-an didto sa dakbayan sa Danao nga miatender atol sa maong pagpirmahanay sa pag-alayon sa Bakud ug LP.

Usa ka dakong dungog alang kang Bise Mayor Nito Durano nga miadto personal si Presidente Aquino alang sa pagpirmahanay sa kasabutan nga atol pa gyud sa iyang adlawng natawhan.

Si Danao City Mayor Boy Durano, ang maguwang ni Nito, wa moapil sa maong pagtigum tungod kay nagkabikil man sila bisan ug kauban sila sa Bakud Party kaniadto. Gani gianunsyo ni Mayor Boy niadtong Biyernes nga di siya makigkita ni Presidente Aquino.

Wa mahimuot si Kong. Pablo John Garcia, ang gituboy karon sa One Cebu Party nga modagan pagka gobernador agig hulip sa iyang maguwang nga si Gobernador Gwen, sa estorya nga ang mga miyembro sa One Cebu party molayat sa LP. Kon mahitabo ni, matinuod ang akong lindog sa English nga ang One Cebu Party ma Once Cebu party unya.

Bisag wa pa nato makita nga ang kadaghanan sa membro sa One Cebu molukso sa LP, apan ang panag-alayon sa Bakud ug LP usa ka timailhan ug sinugdan nga daghan unya ang mokuyog sa LP.

Dako ang purohan nga si Mayor Mike Rama mawala unya sa LP kay atong nakita nga si Kong. Tomas Osmena misikit kang Presidente Aquino didto sa Danao city atol sa pagpirmahanay sa kasabutan.

Bisag mideklarar makadaghan si Mayor Rama nga LP gihapon siya apan iyang wa pag-apil sa panagtagbo sa mga opisyales sa LP didto sa Danao city niadtong Sabado usa ka timailhan nga gawas na siya sa moskitero sa LP.

Usa sa mga rason nga mawani si Mayor Rama sa LP mao ang iyang relasyon ni Gobernador Gwen, nga tsirman sa One Cebu ug kontra kaayo ni Kongresista Tomas. Si Mayor Rama ug Gobernador Gwen suod ug may ilang alayon.

Bisan tuod di makabotar ang mga botante sa dakbayan sa Sugbo sa kandidato sa probinsya, apan si kaniadto Kon. Junjun Davide, ang kandidato sa LP pagkagobernador sa Sugbo, sakop ug kauban ni Tomas sa BO-PK.

Inig patid sa LP ni Mayor Rama segurado nga adto siya modangop sa United Nationalist Alliance (UNA) ni Bise Presidente Binay tungod kay si Gobernador Gwen sakop ug kandidato pagka senador sa UNA.

****

ALAYON. Si Kong. Eddie Gullas, sa unang distrito sa Sugbo, mipahibawo na nga magkuyog ang LP ug ang Nacionalista Party (NP) sa piliay sa sunod tuig. Ang Alayon Party ni Gullas maoy nagdala sa NP dinhis Sugbo.

Matod pa ni Gullas, sa usa ka press release, nga gawas sa NP, ang Nationalist People’s Coalition (NPC) mokowalisyon usab sa LP. Ang alyansa sa LP-NP-NPC maoy moharong sa UNA nila Binay ug kaniadto presidente Joseph Estrada.

Si Gullas, nga modagan og balik pagka mayor sa dakbayan sa Talisay, miingon nga ang NP nangayo og upat ka bahin alang sa kandidato pagka senador. Si Cynthia Villar, asawa ni Senador Villar, ug si Sen. Alan Cayetano modagan pagka senador sa alyansa sa LP-NP-NPC.

Miingon si Kongresista Gullas nga usa ka maayong kumbati unya ang piliay sa mga kandidato pagka senador sa alyansa sa LP-NP-NPC ug sa mga kandidato sa UNA.

(elespinoza53@yahoo.com)