Durano: Istiker nga gamhanan

TUNGOD sa katuyuan nga kahatagan og proteksyon ang kinabuhi sa mga motorista sa atong kadalanan, gipasar sa Kongreso ang Republic Act 10054 kon New Helmet Act.

Samtang nagkasinabot ang tanan nga gikinahanglan ang ensaktong proteksyon sa ulo sa mga nagamitan og nagsakay og motorsiklo kay lahi sa mga sakyanang upat ang ligid. Ang motorsiklo risgo kaayo kay og mawagtangan sa balanse, ang pagkatumba og ang kusog nga pagkadakdak sa ulo ang sagad moresulta gyud ngadto sa hemorrhage.

Apan ang sumpaki mitumaw tungod kay sa pagpatuman ning maong balaod, maoy gitahasan sa pagtino sa ensaktong standards compliance ang ahensiya sa Department of Trade and Industry nga walay technical expertise ning maong trabaho.

Hinungdan nga didto pa sa Singapore mipahigayon sa mga eksaminasyon sa mga produkto unya dayon nahimugso ang listahan sa mga helmets nga matod pa, ilang napamatud-an nga adunay ensaktong integridad nga makapanalipod sa ulo, belts nga makapugong sa gikusgon sa impact. Unya may visor nga makaabag sa panan-aw panahon sa kagabhion ug bisan sa pagkaserado ang maghatag gihapon og ensaktong higayon sa nagamit nga makadungog sa mga tingog diha sa iyang palibot.

Sa pagmatuod nga ang imong gigamit nga helmet ang pasado ning maong standard nga gisetar sa balaod, gibutangan og ICC og PS Mark ang mga produkto nga anaa sa listahan sa Department of Trade and Industry.

Unya panahon sa dinakpanay na sa mga elemento sa Land Transportation Office, kining maong gamhanang istiker nga aduna pa’y hologram ang maghatag usab og kaluwasan nga ikaw dili madakpan ug mamultahan.

Samtang mahimo matod pang kahatagan og gamhanang istiker ang kadtong mga adunay daang mga helmets apan kini ang eksaminun pa sa taga DTI kun anaa ba sa ilang listahan aron ikaw katugutan nga makapalit sa istiker nga tag usa ka gatos ka pesos ang bu-ok.

Ambot og nganong hasulon pa man gyud nato ang publiko ning maong gamhanang istiker nga unta sayon da man kaayo ang pagtino diha lamang sa pagtan-aw sa mga enforcers kun ensakto ba o dili ang gigamit nga helmet sa motorista? Wala na kinahanglana ang pagpahunong arun lang gyud sa paglili sa istiker nga makahasol pa sa kalsada.

Kana og wala’y laing nagpahiping hinungdan ning mao kintahay nga proteksyon nga ang katawhan pa ang gihimong dahilan.