Editoryal: Illegal drugs

ANG Brgy. Tanke sa dakbayan sa Talisay naila na kaayo nga tinubdan sa drugas dinhi sa Sugbo. Kaniadto pa nabaniog nga kini, sama sa Bgry. Pasil sa dakbayan sa Sugbo, tagakanan sa drugas dinhi sa Sugbo niadtong gipayuhot agi sa mga baybayon.

Tungod sa kadugay, nakagamot na og maayo ang pagpayuhot, pagbaligya ug paggamit og drugas sa Brgy. Tanke.

Kon tinuod man ang pagduda sa kapulisan sa Talisay nga ang pagpusil kang PO3 Arnold Damasco may kalambigitan sa pagkasikop sa usa ka drug personality, lain na sab kining kaso diin giatake ang pulis tungod sa anti-drug operations.

Sama sa nahitabo kang PO2 Joseph Clint Cañete sa Regional Anti-Illegal Drugs Special Operation Task Group (RAIDSOTG), nga gipusil patay niadtong Oktubre 2008 sa may Mactan Bridge.

Kon di tinud-on sa kapulisan ug ang anti-drug agency ang kampanya batok sa nagkagrabeng illegal drugs operations sa nasod, particular na dinhi sa Sugbo, moabot gyud ang panahon nga bisan ang mga pulis di na kahadlukan sa mga drug personality.

Mag-unsa man sab ang mga awtoridad kon mismo ang komunidad way partisipasyon sa mao nga kampanya kay sila nagpanagana?

Magpabilin lang nga naa sa hangin ang pangindahay ni Cebu City Police Director Sr. Supt. Melvin Ramon Buenafe ug kaubanang opisyal nga ilang masumpo ang drugas.

Mao nay giingon nga “wish ko lang.”