Mongaya: Salamat Dolphy

TANANG mga Pilipino karon nidako kuyog kang Dolphy. Ako mismo unang nakaila kaniya dihang nipalit si Tatay Doroy sa una gyud namong telebisyon kaniadtong mga kindergarten o grade ba kadto.

Samtang ang ampay nako mao ang cartoons nga Popeye, kadtong unang series nga Batman, ug ang mga gubat nga salida nga Combat ug Rat Patrol, sila si Mam Nats ug Tatay mag-atang sa Buhay Artista.

Sa maong matag semana nga programa ni Dolphy nga nailhan sab nako ang ubang mga artistang Pinoy labi na sila si Panchito ug Babalo. Ug sa pagtan-aw kanila kuyog sa akong ginikanan matag semana, di ko makalimot sa kasadya sa pamilya dihang motukar na ang mga pasiaw.

Naa sab kadtong mga Filipino movies sa telebisyon diin starring sab ang batan-ong si Dolphy ug kadtong mga iyang salida dihang dad-on ko nilang Tatay ug Mam nga manan-aw og sine sa dalan Colon kaniadto.

Dihang nagdako ko labi na sa pagka teenager, padayon na akong nagsunod sa pamilyang Puruntong sa John and Marsha ug sa ngadto-ngadto dihang ako na mismo dunay pmilya kang Kevin sa Home Along da Riles.

Naglibog lang gyud ko nga kining usa ka artista nga nagpakatawa kanatong mga Pilipino sulod sa katuigan wala himu-ang national artist. Hinuon, sa akong pagkuwenta, nawad-an sab og jewel kining giingong pasidungog nga national artist.

Ang tinuod nga national artist mao kining artista nga naa sa atong kasingkasing ug dili kining gideklarar basi sa diktar sa mga politiko.

Bingo

Nilabay na ba ang katuigan dihang ang mga tradisyonal nga mga politiko maghisgot pag mga kaayohan nga ilang masaad kon mapili sa usa ka katungdanan?

Nakapangutana kita niini kay naa na man guy kandidato alang sa pagka kongresista karon nga nangampanya na basi sa duha ka punto: 1) nga siya daghan og kwarta alang sa pagpangampanya, ug 2) nga bisan sayo pa, mahimo nang makatagamtam sa iyang sapi pinaagi sa bingo.

Wa ko makauyon sa tradisyonal nga pamulitika kun trapo. Apan grabi sab nga mangampanya na kining maong kandidato basi lang sa punto nga daghan siyag kwarta nga magamit sa kampanya ug gisugdan na kini sa pag-apod-apod sa katawhan pinaagi sa Bingo.

Nagpasabot ba kini nga ang maong kandidato, kon modaog pagka kongresista sa south district sa Syudad sa Sugbo, mopasanay unya sa sugal? Pahulay oi.

Alang sa pipila nga akong kaistorya, garapalan na gyud kini nga pagtratar sa mga botante diha sa Segundo Distrito sa Syudad sa Sugbo nga mapalit diay sila.

Bisan mag mapalit man gani, kining mga trapo ba mas duna unta silay gamayng respeto sa mga botante. Lahi ra kon makaingon kita nga nibotar kay maayo man ang mga gisaad nga proyekto ug di tungod kay gipalit lang sa kandidatong siguradong masakop sa committee on silence.

Binay

Human sa pagbisita ni Presidente Noynoy Aquino kuyog ni DOTC chief Mar Roxas didto sa Syudad sa Danao sa miaging semana, si Bise Presidente Binay na sab ang nisunod.

Ang preliminary visits, mao ang pag-abot ni Nancy Binay kagahapon sa Sari-Sari Store Festival nga gipahigayon sa Prince Warehouse Club. Tinuig na kini nga pagtapok sa mga tag-iya og gagmayng tindahan nga suki sa Prince.

Matod pa ni Robert Go, ang tag-iya sa Prince Warehouse Club, ang iyang pagtubo nagsalig sa pagtubo usab sa mga suking sari-sari store.

(politika2013.wordpress.com)