Editoryal: Overspeeding law

ANG Land Transportation Franchise and Regulatory Board (LTFRB), Department of Labor and Employment (Dole) ug si Senador Chiz Escudero adunay managsamang maayong katuyoan.

Kini ang pagtubag sa problema kalabot ning sunodsunod nga aksidente sa kadalanan gumikan sa kakusog sa pagpadagan sa mga drayber sa bus de pasaheroan.

Ang Dole mipagawas og department order ngadto sa mga bus operators nga kinahanglang ipatuman ang fixed salary ngadto sa ilang mga drayber ug itratar kini sama sa ubang mga empleyado.

Giabagan usab dayon kini sa LTFRB kinsa mihulga sa mga bus operators nga dili i-renew ang prankisa kon wala kini certificate of compliance gikan sa Dole nga ikapakita.

Ang duha ka ahensiya nagtuo nga ang pagpakusog og pagpadagan sa mga bus drivers nagagumikan sa ilang tinguha nga modako ang ilang commission.

Busa gusto sa ahensiya nga imbis commission based ang income sa mga drivers himuon na lang kining fixed salary aron dini magporsigi sa ilang pagpadagan.

Si Senador Chiz Escudero mipalabang usab og Senate Bill No. 2085 nga magpahamtang og mga bug-at nga silot ngadto sa mga bus driver nga malambigit sa disgrasya sa kadalanan.

Ang silot magdepende kon unsa ka bug-aton ang disgrasya. Sa ato pa, lahi ang silot sa disgrasya nga maingon nato nga minor accident ug lahi pud kadtong dunay mga kinabuhi nga nakalas.

But sad thing to know, nga wa gyuy nagpakabana sa hugot unta nga pagpasunod sa overspeeding o reckless driving law nga mao unta ang epektibo.

Mag-unsa man nang dakong silot unya humana ang hitabo ilabi og mikalas na kini og kinabuhi.