Editoryal: Hazing sa PNP?

KINING alegasyon nga pagpanagmal sa tulo ka mga instructors sa Regional Special Training Unit (RSTU)-7 ngadto sa ilang mga trainees maoy dakong tamparos sa organisasyon sa kapulisan.

Kini tungod kay ang mga tinugyanan sa balaod mao man gyud unta ang modiskurahi sa mga pagpahigayon og hazing ilabi na ngadto sa mga organi­sasyon o fraternity kay lagi usa man kini ka kalapasan sa balaod.

Ang hazing maoy usa ka initiation rites nga sagad gipraktis sa pipila ka mga organisasyon o fraternities sa di pa nila hingpit nga dawaton ang ilang gi-recruit o aplikante.

Niadtong 1995 ubos sa administrasyon ni kanhi Presidente Fidel V. Ramos napapasar ang Republic Act no. 8049 o anti-hazing law.

Kining maong balaod nag-regulate sa pagpahigayon og hazing o uban pang initiation rites sa mga fraternities, sororities ug organizations.

Ang termininong organizations naglakip sa Armed Forces of the Philippines, Philippine National Police ug Philippine Military Academy.

Niadtong Hulyo 13, pito sa 12 ka mga police officers nga apil sa anti-insurgency course sa lungsod sa Sibonga, Cebu ang mireklamo sa National Police Commission tungod sa pagdagmal sa mga instructors (duha ka babaye ug usa ka lalaki) ngadto kanila.

Sa ilang alegasyon, bunalbunalan og kahoy ang ilang lapa-lapa sa higayon nga dunay kasaypanan silang mabuhat.

Kon tinuod man gani ni, hinaot nga masilutan ki­ning maong mga instructors aron kini maoy magsilbing leksiyon o kapanaminan sa uban.

Taodtaod na ta nga nakadungog nga adunay hazing sulod sa PNP o bisan sa military organization, pero wa pa ta kadungog og duna bay nasilotan.