Editoryal: Suicide ug pamilya

KADA tuig, nagkataas ang mga kaso sa suicide. Gani, giingon man nga nahimo nang suicide capital ang Sugbo kay duna may usa nga maghikog kada adlaw.

Lainlain ang katarungan sa paghikog. Dunay pinansyal, gugma ug problema sa pamilya.

Sama sa giantos sa usa ka 13-anyos nga batang babaye nga taga dakbayan sa Naga nga naghikog tungod kay wa na makaaguwanta sa pangabuso sa iyang amahan kaniya.

Giingong gipamabdusan sa amahan ang iyang anak. Bug-at gyud tuod kaayo ang problema hinungdan nga nakahukom ang bata nga putlon ang iyang pagpuyo sa kalibutan.

Iya tingaling nakita nga wa siyay kapaingnan ug kasandigan sa iyang giatubang nga problema. Bugtong paagi aron siya makalingkawas mao ang pagtubok.

Di unta kini mahitabo kon ang ubang mga sakop sa pamilya dunay gihatag nga panahon ngadto kaniya ug sa iyang mga igsuon.

Apan ang nakapait kay way panahon ang mga sakop sa pamilya. Kini tungod kay kon di man busy sa pagpanginabuhi, mahadlok sila nga manghilabot.

Dunay uban nga mas palabihon pagtago ug pagtabon ang malaksot nga panghitabo tungod kay mahadlok nga mauwawan.

Kon kini lang nga mga katarungan ang palabihon, makita diha ang kakuwang sa gugma ug kahakog. Kay kon gugma pa ang nagpatigbabaw, sulod sa kaugalingon ug sa pamilya, way makahuna-huna sa paghikog.

Subo kaayo nga palandungon nga kini nahitabo sa nasod nga giingong sabakan sa Kristiyanismo dinhi sa Southeast Asia.