Durano: Listahan

NAKITA ni Archbishop Eme­ritus Ricardo J. Cardinal Vidal nga walay padulngan ang padayong pakig-estorya sa Simbahang Romano Katoliko sa palasyo sa Malakanyang sa isyu sa Reproductive Health. Hinungdan nga sa iyang kapasidad isip senior adviser sa gamhanang Catholic Bishops Conference of the Philippines (CBCP), maoy iyang isugyot nga hingpit ng biyaan ang walay pulos nga negusasyon ug adto nalang unya tan-awon ang katag sa umaabot nga eleksyon.

Minaldito ang pagawi sa terminong “responsible parenthood” imbis sa “reproductive health” kay kini usa man ka pagbalising ug panagang daan sa mamahimo unyang negatibong reaksyon sa katawhan.

Ang labaw nga salawa­yon kay karon nga wa gyud makalusot ang ilang gusto sa Kongreso, si Pangulong Benigno “Noynoy” Aquino ang kusganong miduso sa iyang 5-point position sa responsible parenthood pinaagi sa iyang gipakanaug nga executive order nga direktang ipa-implementar sa Department of Health (DOH).

Ug tutukan pagmaayo, ang unod sa maong kamanduan sa Presidente naglambigit sa mga susamang mga pamaagi nga anaa sa RH Bill.

Mao nga hasol ug langay na kaayo ang pagpaka-aron ingnon nga adunay komon nga solusyon nga makab-ot pa ang simbahan ug kagamhanan ning maong isyu.

Busa sila karon sa CBCP ang magpakatakos na sa paghimo og listahan nga aduna unya’y mga pangalan sa mga kandidatong ilang gipilian ug gihashasan nga maoy pabotaran sa atong katawhan. Sa rason nga sa ilang pag-ayag, ang maong mga pulitiko ang tinud-anay nga magahatag sa diniyos nga serbisyo nga nagasubay sa moral nga katungdanan sa pagdepensa sa kinabuhi.

Samtang tinuod nga obligasyon sa Simbahan ang pagpanalipod sa mga moral og natural laws, apan ang direktang pakiglambigit sa duwa sa pulitika nga mo-abot na sa punto nga sila da ang magbuot kinsay botaran ug kinsa’y dili angayang botaran ang seguradong maganoy sa institusyon sa atong pagtoo sa mahugaw nga duwa sa yawa.

Bisa’g unsaon pa sa paghapin, nga kini ang katapusang linyada sa depensa batok sa rehimeng walay respeto sa kinabuhi. Apan ang maong buhat ang nagpakita usab sa pagkawala’y respeto sa free will sa atong katawhan.

Angayan natong bantayan kay ang kusog ra ba kaayo nga motukoy sa gusto sa mga pari mao ang mga pulitiko nga maayo kaayong magpa-piyong piyong sa mata atol sa misa apan diay mga milagroso sa ilang pagpangatungdanan sa gobyerno.