Durano: Tanghaga luyo sa piyansa

NAKATUAW sa dili matukib nga pagmahay ang banay ug kahigalaan ni kanhi Presidente Gloria Macapagal Arroyo sa dakong inhustisya nga nila pa, gidangatan sa usa ka tarong nga lider sa nasud. Diha sa iyang pagkapriso og walo gyud ka buwan tungod lamang sa sumbong nga electoral sabotage nga wala’y sukaran. Nga sa maong hinungdan napugos si Regional trial Court Branch 112 Judge Jesus Mupas sa pagtugot kang Arroyo sa pagpiyansa og P1 milyunes.

Sa maong pito ka pahina nga resolus­yon sa korte, gitumbok nga hinungdan sa maghuhukom ang kapakyas sa prosekusyon sa pagpresentar og lig-ong ebidensya, sarang mamahimong sukaranan sa pagbalibad sa petition for bail sa hingtungdang akusado.

Mao da’y gisaligan sa maong reklamo batok kang Arroyo ang testimonya sa nagbinugtong nga testigo nga si Norie Unas, kinsa kanhi administrador sa lalawigan sa Maguindanao.

Nga mipasangil sa kongresista sa segundo distrito sa Pampanga nga iyang nadunggan nga mihatag og kamanduan sa pagseguro sa kadaugan sa 12 por 0 pabor sa Team Unity sa senatorial slate.

Ang nakaporke lamang kay gikonsiderar usab pag-apil sa korte ang pagkumpisal ni Unas nga napugos siya sa pagbutyag ning maong impormasyon isip bugti sa iyang madawat nga immunity kun pagkalingkawas sa bisan unsang tulubagon sa kaso tungod sa iyang pagka-state witness.

Unya kay gawas kang Unas, wala nama’y laing object or testimonial evidence nga mamahimong makapalig-on sa kalambigitan ni GMA sa maong pulitikanhong sabotahe ang napresentar. Mao nga napugos ang korte sa pagpakanaug og desisyon nga pabor kang Arroyo.

Ang pagsang-at ning maong mga lugak nga mga kaso nga wala gani bisan usa ka corroborating testimony maisip nga tanghaga. Kay unta sila sayod nga mga celebrated personalities ang ilang mga gipasanginlan. Nga aduna usa’y igong kapasidad sa pagkuha sa serbisyo sa pinaka-ngilngig nga mga abugadong de-metro sa nasod aron kuwestyunon ug busisihon ang ilang trabahong buslot.

Ning bag-o, mao na usa’y gipasiatab sa Palasyo sa Malakanyang nga dili angayang mabalaka ang katawhan kay dili gihapon makasibat sa nasud si GMA kay may laing kaso sa plunder nga nagsunod karon sa Sandiganbayan.

Hinaut pa nga dili lamang kutob sa paukyab kining kampanya sa administrasyong Aquino, kay seguradong wala’y pagpanglimpyo nga mahitabo kon ang kaya da nilang buhaton mao ra ang pamasangil apan dili kasustinir sa pagpamatuod.