Bañoc: Lantugi sa RH Bill

SUBLING naukay ang Simbahang Katoliko sa pagpakigbatok sa kontrobersiyal nga Reproductive Health (RH)Bill human nahisgotan ni PNoy sa iyang ikatulo nga State of the Nation Address (Sona) ang responsible parenthood.

Gisabot kini sa Simbahan nga ang Presidente subling mogamit sa iyang puwersa sa Kongreso aron idayon ang pagpasar sa mao nga balaudnon. Si Cebu Archbishop E­meritus Ricardo Cardinal Vidal daling nakapadayag nga makita lang unya sa sunod piniliay ang kaugmaaon sa mga politiko nga mosuporta sa RH Bill.

Ang Simbahan wala nay lipulipod sa pagpamahayag nga sila mangampanya batok sa mga kandidato nga mosuporta sa nahisgotang balaudnon.

Ang naila nga pro-life advocate nga si Dr. Rene Josef Bullecer namahayag nga dili daotan ang nahisgotang plano sa Simbahan. Si Bullecer nga nahinabi sa akong programa Straight to the Point sa dyHP miingon nga mas epektibo ang Simbahan sa kampanya batok sa RH Bill kon wagtangon niini ang kaikog sa pagpangampanya batok sa mga politiko nga pabor sa maong balaudnon.

Ang Catholic Bishops Conference of the Philippines (CBCP) nga gipanguluhan ni Arsobispo sa Sugbo Jose Palma misaway sa gobyerno sa plano nga mamalit ug kontraseptibo nga balor og P500 milyones.

Sumala sa CBCP nga inay kontraseptibo ang gamitan sa mao nga kantidad, mas maayo pa og gamiton kini sa kampanya batok sa child labor kon kampanya batok sa pagpanrabaho nga ginamit ang kabataan.

Si Iloilo Congresswoman Janette Garin, senior deputy minority leader, ang usa sa mga miduso ug balaudnon sa pagpasar sa RH Bill. Unom ka mga gihiusa karon nga balaudnon sa RH bill ang padayong nakatanggong sa Kamara.

Si Garin nga ako usab nga nahinabi mipadayag nga ang RH Bill ipasar aron mahimong responsable ang mga ginikanan sa ilang obiligasyon sa mga anak. Iyang gihulagway nga gumikan sa mga ginikanan nga nagpatuyang sa pagpanganak, daghang mga bata ang napasagdan ug miresulta ngadto sa child labor.

Labihan ka lapad sa hisgutanan sa mao nga balaudnon. Karong Agusto 7, ang Kamara magbotohay kon ipadayon ba o dili ang debate sa RH bill. Si Kongresita Pablo Garcia sa ikaduhang distrito sa probinsya sa Sugbo una nang mipahibawo nga siya mobotar sa pagpadayon ug lantugi sa RH bill. Ang mahitabo karon Agusto 7 mamahimong barometro kung dunay bay chansa nga mapasar ang RH bill.

Kung mauyunan nga tapuson na ang debate sa mao nga balaunon, nan botohan na kini kung mopasar ba sa ubos balay balaoranan o dili. Ang mga tigpasigda sa RH bill niingon nga daghan ang mga kongresista nga moboto aron mapasar kini. Apan ang mga dumadapig sa simbahan miingon usab nga daghan ang mga dili mosugot nga mapasar ug mobararog alang sa simbahan. Atong atangan ug respitahan unsay mogawas sa ilang unyang pag boto.