Editoryal: Malacañang sa Sugbo

MAS maayong magpabilin ang kasamtangang Malacañang sa Sugbo ug dili ibalik ang edipisyo sa Bureau of Customs (BoC).

Usa na kini sa mga nahimong sentro sa turismo sa Sugbo ug mas nakadugang sa kaanindot sa makasaysayanong Plaza Independencia -- nawala na ang iyang imahen sa mga pagduda dihang giokupahan pa kini sa BoC.

Mas maayo nga ang BoC magtukod og iyang bag-o ug modernong edipisyo nga mohaom subay sa kabag-ohan sa panginahanglan sa nagkadako nga buhatan.

Si BoC Deputy Comissioner Administrator Juan Lorenzo Tañada nagkanayon nga ang kasamta­ngang buhatan sa Cebu Port Autority (CPA) huwang ug risgo sa linog ug buot mobalik sa unang edipisyo.

Dili ba ang BoC maoy usa sa mga ahensya sa kagamhanan nga dako og kita? Nganong dili man sila magtukod og bag-ong buhatan? Magkuwang unya ang ilang kita?.

Karaan na kaayo ang edipisyo. Tataw nga wa na mohaom sa operasyon sa BoC ning modernong panahon.

Ang kanhi edipisyo sa BoC kabahin sa mga kabilin nga garbo sa Sugbo nga angay atimanon. Kay kon wala pa kini makuha sa Turismo, seguro nahisama sa ubang karaang edipisyo nga nahanaw ug wala na masud-ong sa bag-ong henerasyon.

Hinuon, makasabot kita kang Tañada kay dili kini lumad nga Bisaya ug walay pagbati sa atong mga kalabilin ug kultura -- posibling kuwarta ug kaharuhay lang sa buhatan maoy gipalabi sa pagdumala.

Dakong hagit kanatong Sugboanon ug mga Bisaya nga nagmahal sa bahandi nga atong kabilin nga mapanalipdan, mapreserbar ug mapalambo aron makasaksihan pa kini sa atong mosunod nga kaliwatan.

Magpabilin ang Malacañang sa Sugbo.