Barrita: Ang Diktador

SI ADMIRAL General Shab­azz Aladeen, mao ang diktador sa mugna lang sa huna-huna nga Republic of Wadiya sa North Africa sa salida nga, “The Dictator.”

Ang papel ni Admiral General Aladeen, nga giingong gibasi sa tinuod nga mga diktador sama nila ni Saddam Hussein sa Iraq, Muammar Gaddafi sa Libya ug Kim Jong-il sa North Korea, gidala sa komedyante nga si Sacha Baron Cohen.

Sa usa niya ka diskurso sa maong pelikula, niingon siya, “Why are you guys so anti-dictators? Imagine if America was a dictatorship… Your media would appear free, but would secretly be controlled by one person and his family.”

Ubos sa usa ka diktador, pulos na lang unya mga maayong balita ang atong mabasa sa mga pamantalaan, madungog sa radio ug makita sa telebisyon.

***

Mag-una-una ta kay sa sunod buwan, mahinumdoman na sab nato ang pagdeklarar sa balaod militar dinhi sa Pilipinas. Natural na lang nga nahimong diktador ang nagdeklarar sa martial law.

Apan sa wa pa siya mahimong diktador, gigamit niya nga kasangkapan ang gawasnon nga
prensa nga iyang gipahilom sa dihang nadiktador na siya.

Sa salidang The Dictator, nakalimot si Admiral General Aladeen nga diktador siya ug niingon, “I am for free press, fair elections and equal rights for women...”

Nisugod siyag katawa sa dihang nakaamgo siya ug niingon, “Pfft! I can’t say that.”

***

Daghang mga maayong balita apan ang mga headlines, ilabi na sa balita sa telebisyon, mao kadtong bahin sa pinatyanay ug sa uban pang mga krimen nga sensational.

Mao bitaw kana nga giingon sa mga tigbalita kon ang tawo paakon sa iro, di na balita.

Ang balita mao kon ang tawo maoy mopaak sa iro.

Busa ang bag-ong dan nga tul-id ug maayong pagkasemento di na balita. Pero kon ang karsada mahimong sama sa ampaw sa syudad sa Carcar, labi na gyud kon simbako mahugno, dako nang balita.

Mao tingali kini ang hinungdan nga niingon si Presidente Noynoy Aquino sa iyang diskurso atol sa ika-25 nga anibersaryo sa TV Patrol sa ABS-CBN, “Sana po, sa tuwing sasabihin nating ‘Magandang gabi, bayan,’ ay totoong hinahangad nating maging maganda ang gabi ng bayan.”

***

Kon diktador pa si PNoy, di na siya makasulti og ingon niana kay pulos na man lang mga maayong balita ang iyang makita sa TV Patrol.

Apan ingon sa maoy iyang gustong paminawon ang mga maayong balita. Sama pananglit nga imbis nga ang Pilipinas maoy nangutang kaniadto, kita na karon ang nagpautang og usa ka bilyon ka dolyar ngadto sa International Monetary Fund (IMF). Wa lang isulti kon nangaimpas na ba ang tanan natong mga utang.