Bañoc: Hukom sa RH bill

UGMANG adlawa na botohan sa mga Kongresista sa Kamara kon angay ba o dili nga ipadayon ang debate sa kontrobersiyal nga balaudnon nga Reproductive Health (RH) Bill.

Samtang niadtong Sabado, libuan sab ka mga tawo ang miduyog sa solidarity march nga gipanguluhan sa Simbahang Katoliko aron ipakita nga lig-on ang puwersa sa mga magtutuo nga misupak sa mao nga balaudnon.

Dinhi lang sa dakbayan sa Sugbo, gibana-bana sa kapolisan nga dili momenus sa 7,000 ka mga tawo ang mimartsa paingon sa Fuente Osmeña agig pagsuporta sa baruganan sa Simbahan.

Apil sa kalihokan mao ang pagtuyok ug kapito ka higayon sa Fuente Osmeña circle nga dinuyugan sa mga pag-ampo nga gipanguluhan ni Cebu Archbishop Jose Palma.

Gipanig-ingnan ni Palma ang nahitabo sa lig-on nga pader sa Jericho nga nahugno gumikan sa mainitong pag-ampo sa katawhan ngadto sa Diyos.

Miapil usab sa mao nga rally ang mga dagkong opisyal sa Sugbo sama nila ni Gobernador Gwendolyn Garcia, Talisay City Mayor Socrates Fernandez ug kanhi Cebu City North District Congressman Raul del Mar.

Nabalaka ang Simbahan nga kon tapuson na ang lantugi sa RH bill, basin ug dunay maniobra diha sa Kamara kay mas daghan sa mga Kongresista ang kaalyado ni PNoy kinsa wala nay lipu-lipod nga mipadayag sa iyang suporta sa RH bill.

Samtang ang uban nga mga Kongresista nga uyon sa RH bill gusto nga tapuson na ang lantugi sa nahisgotang balaudnon ug magbotohay na lang kon angay ba o dili nga ipasar ang RH bill.

Lawom kaayong hisgutanan ang RH Bill. Ang Simbahan ug ang mga pro-life advocates nagtuo nga pro-abortion ang mao nga balaudnon. Samtang ang mga uyon sa RH mihimakak sa pasangil ug miingon nga manalipod sa gisabak nga bata ang balaudnon.

Matag usa kanato adunay tagsa-tagsa ka baruganan sa nagkadaiyang mga isyu.

Angayan ba gyud nga tawgon nga mga anti-life ang mga ni pabor sa RH bill? Angayan ba usab gyud nga tawgon ug pro-life ang mga nisupak niini?

Maayo unta u gang matag-usa mosusi gayud ug unsa kining maong balaod-non. Mas labing maayo sa mga Congrisista nga mobasa, mosabot sa ilang gibasa ug mag-ampo sa dili pa mohatag sa ilang boto ugmang adlawa.

Kung modaug ang boto nga ipadayon pa ang debate, nan ako nagtu-o nga dili na mapasar sa hingpit ang maong balaod kay maabtan naman s aka bise sa mga magbabalaod pag preparer sa sunod nga pinilay ug maabtan na sa pagsirado sa 15th Congress.

Apan kung modaug ang boto nga hunongon na ang debate, nan atangan nato ang laing pag boto kung ipasar na ba gyud ang maong balaod o dili.

Ako nagtuo nga bisan unsay resulta sa botohay ugma sa kamara nagpasabot nga dunay mensahe kanato ang kahitas-an. Atong i-ampo ang atong mga kongisista nga lamdagan sila sa Espirito Santo sa ilang pag boto.