Barrita: Nganong walay Pacman sa Olympics?

SI MARK Anthony Barriga, ang 19-anyos nga boksidor gikan sa Panabo City, Davao del Norte, mao unta ang nahibiling paglaom sa Team Philippines nga makalangkat og medalya sa London 2012 Olympics.

Apan sa iyang away niadtong Sabado sa gabii aron unta makasud siya sa quarterfinals, gipildi siya sa score nga 17-16 sa iyang kaparang nga si Birzhan Zhakypov sa Kazakhtan.

Nahanaw daw aso ang atong paglaom nga makakuhag medalya sa boksing sa labing unang higayon sa milabay nga 16 ka tuig.

***

Giila ang Pilipinas sa tibuok kalibotan sa natad sa boksing tungod tingali sa pagpanghawod ni Manny “Pacman” Pacquiao.

Gani, si Barriga gitawag man of “Little Pacman” tungod kay bisan sa iyang kagamay maayo siyang moaway.

Pero syaro na man sab, hapit na moabot og usa ka gatos ka milyon ang mga Pilipino unya usa ra gyud ka Little Pacman ang atong gipadala sa Olympics?

***

Lahi ang boksing sa usa mga sports diin bisan ang mga professional makaapil sa Olympics sama sa basketball, tennis ug uban pa. Sa boksing ang mga amateur ray makaapil sa Olympics.

Mao kana nga ang atong numerong boksidor, si Manny Pacquiao, di gyud makaapil sa
Olympics.

Kon gitugotan pang makaapil si Pacman, mora unta og nagmina og bulawan ang Pilipinas didto sa London Olympics.

***

Gipakita sa labok sa atong mga atleta didto sa London Olympics ang makalolooy nga kahimtang sa atong sports development program.

Dako unta kaayo natong garbo kon makaangkon kitag medalya sa Olympics sama sa Estados Unidos, sa People’s Republic of China, Great Britain ug South Korea.

Ang akong gikaloy-an kadtong pasahero sa jeepney nga naluyag pakli-pakli sa newspaper samtang nagtan-aw sa medal tally kay nangitag pila nay medalya sa Pilipinas.

***

Wa nay klaro nga departamento sa kagamhanan nga gitahasan sa pag-ugmad sa sports sa atong kabataan.

Ang kniadtong Department og Education, Culture and Sports (Decs) gihimo na lang nga Department of Education (DepEd). Nawagtang ang culture ug sports.

Alang kanako mahinungdanon ang sports. Ang himsog nga katawhan nagpakita sa usa ka himsog nga nasod. Ang himsog nga nasod busog. Di lang busog, sakto pas sa mga bitamina ug minerales.