Nadela: Mga pasaherong stranded sa pier

HISGOT lang gud. Kapoy, gutom, uhaw ug puno sa kabalaka ang panagway sa atong mga igsuong pasahero nga natanggong sa mga pantalan sa dakbayan sa Sugbo sa miaging semana.

Maminaw ka sa ilang sugilanon di kalikayan nga bation ka og kaluoy ilabi na niadtong wa na gyuy makuot alang sa ilang inadlaw nga panginahanglan sama sa pagkaon. Di lalim kung ma-stranded ka og tulo ngadto sa upat ka adlaw ilabi na kung wa kay kadangpan nga paryente.

PAGKAON

Kung malangay ang imong biyahe samtang magsakay og barko, obligasyon sa management ang pagpakaon sa iyang mga pasahero. Kung ma-stranded ka sa pantalan tungod sa dautan nga panahon kinsa may mopakaon nimo? Wala. Ngano man? Tungod kay pagbuot sa panahon.

Puwerteng paita ilabi na kung wa kay paryente sa pantalan diin ka natanggong. Ug mao ni nahitabo sa niaging semana.

Ang mga na-stranded nga pasahero sariling sikap aron matambalan ang nagkutoy nga tiyan. Way ahensya sa gobiyerno nga nagpakabana bisan pagtunol na lang og ininit tubig para mainitan ang tiyan. Unta to dunay mosusi sa ilang pang­lawas ilabi na sa mga bata. Total di man ni kagustuhan sa mga pasahero nga matanggong sa pantalan.

Sa ato pa sa sunod nga pagdaut sa panahon unya daghan na sab ang ma-stranded, sorry nalang, paningkamot mo nga makalahutay hangtod nga duna nay byahe. Kung usa ka semana ka ma-stranded, aw, usa ka semana sab ka nga mag-antos.

PWEDE BA

Kung di pwede makabyahe ang gagmayng barko og fastcraft kung dagko ang balaod, dili ba pwede nga hakuton sa mga dagkong barko ang ma-stranded nga mga pasahero? Mao ni pangutana ni Ronero Gilbuena nga taga Tagbilaran City. Nganong dili, total di man kada adlaw nga kusog ang hanging habagat.