Espinoza: Kulba-hinam nga piliay

ASA NA? Ang Commission on Audit (COA) mimando sa dakbayan sa Lapu-Lapu nga iuli ang P8.7 milyunes nga wa magamit sa pagpa-anindot sa dakbayan atol sa 12th Asean Summit niadtong tuig 2007.

Naa pa ba kaha ni nga kwarta? Matod pa sa taho, niadtong Disyembre 2006 ang dakbayan sa Lapu-Lapu nakadawat og P15.6 milyones nga hinabang gikan sa Department of Tourism (DOT) ngan nga usa sa mga dakbayan nga moabi-abi sa summit.

Ang mayor niadtong higayona si Boy Radaza pa nga karon kongresista na sa nag-inusarang distrito sa dakbayan sa Lapu-Lapu. Matod pa sa COA, ang nagasto sa dakbayan sa Lapu-Lapu alang sa preparasyon P6.9 milyones ra.

Sa ato pa dunay P8.7 milyones nga wa magasto alang sa preparasyon sa Asean Summit. Usa ka dakong purohan nga wa na ni nga kwarta karon kay si Mayor Paz Radaza naningkamot nga ma-realign ang maong pundo.

Gani nasakpan sa COA nga dunay P2.7 milyones nga gigamit sa dakbayan sa Lapu-Lapu gikan sa pundo nga gihatag sa DOT sa usa ka proyekto nga way apil sa preparasyon alang sa Asean Summit.

Dunay proyekto ang dakbayan sa Lapu-Lapu alang sa pagpaanindot sa dakbayan. Apan ang atong makita nga gipaanindot mao ra ang dalan sa M. L. Quezon Ave. Samtang ang uban nga kadalanan haskang batia.

Kon ang nagasto sa pagpanindot sa M. L. Quezon Ave. mikabat og P6.9 milyones, grabeng mahala tungod kay ang tanom mga kuritas ra man ug gidekorasyonan sa pebbles ang kilid niini.

Gitambagan usab sa COA ang dakbayan sa Lapu-Lapu nga adto mopalit og tambal sa Vicente Sotto Memorial Center aron makabarato. Luoy ang mga pribadong suki sa tambal sa dakbayan kay mawad-an unya og negosyo.

Nahibaw-an usab sa COA nga ang dakbayan sa Lapu-Lapu namalit og tambal nga balor P2 milyones nga wa mosubay sa polisiya sa kagamhanan sa pagpamalit og tambal. Hinuon, di
na balita ang kalapasan nga nahimo sa dak­bayan.

BOBOY DURANO. Da­ko og purohan nga si kanhi Danao city Bise Mayor Boboy Durano mao ang mahimong’ kandidato pagka bise gobernador sa One Cebu Party. Si Kong. PJ Garcia dako og pagsalig ug tahod ni Boboy sa iyang kapabilidad.

Sa miaging semana si Kongresista PJ, ang gibaniog nga kandidato pagka gobernador sa One Cebu Party, ug si Bo­boy Durano uban ni Danao City Mayor Boy Durano, amahan ni Boboy, ug si Gob. Gwen Garcia nagkuyog atol sa anibersaryo sa probinsya.

Gibutyag ni Kongresista PJ nga dako siya og pagsalig ni Boboy Durano. Si Boboy Durano wa pa mopadayag kon modagan ba siya o dili pagka bise gobernador. Apan daghan na ang misuporta sa mahimong pagparis unya nila ni Kongresista PJ ug Boboy.

Tungod sa pagtapon ni Danao city Bise Mayor Nito Durano ngadto sa Liberal Party, si Mayor Boy Durano mihurar nga sakop sa One Cebu Party ug sa UNA ni Bise Pres. Jejomar Binay.

Kon modayon si Boboy Durano og dagan nga bise gobernador ni PJ, si Bise Gob. Agnes Magpale ang iyang maatbang unya sa Mayo 2013 nga piliay. Si Magpale sakop ni Nito Durano sa Partido Bakud.

Bisan tuod sa Oktubre pa nato mahibaw-an kinsa ang mga kandidato, apan kon mahitabo nga ang mga kandidato pagka bise gobernador pulos taga dakbayan sa Danao mahimong’ usa ka kulba-hinam unya ang piliay dinhing’ dapita.

(elespinoza53@yahoo.com)