Bañoc: Lipatlipat sa RH bill

PUWERTENG pagkalipata sa kadagkuan sa Simbahang Katoliko human wala mituman sa gitakda nga petsa ang mga Kongresista sa pagbotohay kon angay pa ba o dili nga padayunon ang lantugi sa nakontrobersyal nga Reproductive Health (RH) Bill.

Kagahapon untang adlawa ang nasabotan nga botasyon alang sa nahisgotang balaudnon apan unsa bang hitaboa nga gidali man ang botasyon niadtong Lunes sa hapon human sa pagpakigtigom ni Presidente PNoy sa 182 ka mga Kongresista.

Nikabat sa 249 ka mga Kongresista ang mitam­bong sa mao nga deliberasyon nga naglangkob ni Kongresista Pablo Garcia sa segundo distrito sa probinsya sa Sugbo.

Si House Majority Leader Neptali Gonzales II ang midiga og musyon aron himuon na ang botasyon sa pagtapos sa debate sa RH Bill. Dali kining gisuportahan sa mga kaalyado sa Liberal Party (LP).

“Who will we to listen to? The clergy or the people who elected us?” (Kinsa may atong paminawon? Ang kaparian o ang katawhan nga maoy nagpili kanato?), ni Kongresista Rodolfo Biazon sa Muntinlupa.

Samtang nawad-an og pasensiya si Cagayan de Oro Congressman Rufus Rodriguez tungod sa iyang kasuko nga wala motahod sa gikasabotang petsa ang iyang mga kaubang Kongresista.

“There is an acceleration to terminate this contrary to all agreements done” (Adunay kausaban nga kini tapuson sukwahi sa tanan nga una nang nasabotan), ni Rodriguez.

Apan ang pro-life advocates sa Sugbo gibati ug kahingangha kon nganong wala man gyud
mopabati og imik si Cong. Garcia. Si Garcia una nang nanganti nga siya makigdebate aron ipadayon ang lantugi sa RH Bill.

“Nahibulong man lang god ta kay wala man gyod siyay gihimo. Nagbasa man lang og newspaper’, ni Dr. Rene Josef Bullecer, Executive Director sa Human Life International.

Samtang, si Cebu Archbishop Jose Palma mipadayag sa iyang kahiubos atol sa akong programa Straight to the Point sa dyHP. Si Palma gikatakda untang motambong kagahapon sa botohay sa mga Kongresista.

“Andam pod kong magpa-priso kay against man ko sa RH Bill”, ni Palma.

Ang reaksyon ni Palma susama sa reaksyon ni Cebu Archbishop Emeritus Ricardo Cardinal
Vidal.

Una nang nahingawa ang Cardinal nga daghan unya ang mapriso gumikan sa pagtuong gisukip sa probisyon sa RH Bill nga mapasakaan og kaso ang mga mosaway kon mahimo nang hingpit nga balaod ang maong balaudnon.

Karon nga gihunong na ang lantugi sa RH Bill, ang sunod nga gipangandaman sa Simbahan mao nga dili kini mapasar sa ngadto na hingpit nga balaod. Unta sa aktuwal na nga botohay alang niini, mobotar ang atong mga Kongresista base sa diktar sa ilang konsensya ug dili tungod sa politika.