Editoryal: RH bill ‘gihiklin’

KASAMTANGANG gihiklin o gipadaplin una ang debate sa kontro­bersyal nga Reproductive Health (RH) bill human sa botasyon sa Ubos Balay-Balauranan kagahapon.

Gikasagmuyo kini sa mga pro-RH bill nga kadaghanan gikan sa mga walhong grupo o aktibista, mga dagkong kapitalista ug mga langyaw nga kompaniya. Talagsaon kini nga panagkomboya sa walhon ug tuong grupo.

Ang pro-life advocates o mga batok sa RH bill nga gipangunahan sa Simbahang Romano Katoliko nagmaya sa hamubo apan walay tino nga kalamposan. Mas gusto nila nga hingpit kining mabasura, dili lang ihiklin.

Apan, nganong nangusog ang mga lang­yawng institusyon uban sa pagpaluyo sa mga dag­kong langyawng kompaniya nga mapasar ang RH bill? Apan taliwala sa ilang giingong nga pagkabana sa pagburot sa populasyon sa nasod, unsay laing nagpaluyong interes? Dili kaha negosyo?

Nasayod kita nga sentro sa maong balaudnon mao ang family planning, programa nga dugay nang gisagop sa kagamhanan. Kuwang lang seguro sa tino nga pagpasabot ug implimentasyon.

Samtang, mas gawasnon kita karon sa paghukom alang sa atong kaugalingong lawas -- walay diktador nga estado. Dili ba kini maoy pakigbisog sa walhon? Ang tawhanong katungod ug gawasnon sa langyawng dominasyon.

Maayo usab nga panaminan nato ang epekto sa nagkaliberal nga balaud sa Kasadpan diha sa epek­to sa moralidad sa publiko ug mithi sa relasyon sa pamil­ya, ang labing ubos nga ang-ang sa sosyodad.

Ug ang simbahan, tigbantay sa moralidad, dunay dakong kaakohan sa paggiya sa espirituwal ug pisikal nga bahin sa iyang katawhan.