Lariosa: Pasidungog kang Dr. Allego

GARBO sa Sugbo si Dr. Mel M. Allego, Jr sa Tuburan, Cebu. Gawas sa iyang pagka mananambal, siya usa ka premyadong magbabalak sa atong dila.

Tuig 1969, dihang gitukod niya ang Bathalad (Bathan-ong Halad Sa Dagang). Batan-on pa siya niadto nga magbabalak, apan nag-umido ang kalapyo ug kalab-as sa iyang damgo pagpalambo sa atong pinulongan ug literatura. Miuban ug midugok kaniya ang mga batan-ong magsusulat.

Busa ning-alirong sila si Lorie,Melchor, Erning, Lam, Eyon, Manuel, Roger, Rudy, Jesus, Tem, Urie, Edfer, Romy, Zosing, Frank, Arman, Fidel, Rene, Jun, Laurean, Nick ug Ricardo sa liso nga iyang gitisok. Nidagan ang katuigan nag-iyahay mig panghipos sa mga tipaka sa among ugma dinasig sa lamang sa among dagang.
Si June (angga niya) nanimpalad sa Amerika sa 1974, apan nanumpa sa iyang paggikan nga siya di motalikod sa Bathalad samtang buhi pa ug makig-anduhay sa iyang kapalaran sa Amerika.

Ang pundok nanisikay-sikay sa pagpakabuhi. Kanunay siyang nagsulat kanamo agig pagdasig. Wa siya mokutat pagsuwat og mga balak daw tinubdan nga way paghubas. Dinhi gimatuod niya ang iyang gugma sa panuwat nga daw giputos sa misteryo nga siya ra ang nakatugkad.

Kinsay di mahibung sa lanat sa iyang pagka magbabalak nga bisan sa kalampusan nga iyang naabot isip doctor sa Amerika nagpadayon siya sa pagmahal sa atong dila. Kon lain pa siya, dugay nang nakalimot sa kultura sama sa nahitabo sa kadaghanan didto.

Gikan sa 1980 hangtod karon, siya ug ang iyang paningkamot maoy nag-ugmad sa tinuig nga bangga sa sinuwatay sa balak, sugilanon, usa- ka- akto -nga duwa, gumalaysay, nobela ug karon gipun-an og sugilanong pambata ug katitikanhong paghukngay (literary criticism).

Didto sa Amerika nanuwat sad siya sa Ingles ug nakab-ot niya ang kalampusan sa iyang pagdaog sa Golden Poet Award sa World Press in 1985. Ug ang iyang ubang obra nakailok sa pahatanan sa “Who’s Who in the Midwest.” Nakasuwat siyag daghang mga artikulo sa
natad sa pakisusi nga namantala sa mga medical journal sa Amerika.

Sa miaging tuig, sa Cebu Normal University (CNU) gilusad niya ang iyang unang basahon sa mga balak sa mga dekada ’60, ’70, ’80, ’90 ug karong mga adlawa. Gitambungan sa batan-on ug hamtong nga mga sakop sa Bathalad-Cebu ug Mindanao atol sa tinuig nga kumbensiyon sa pundok.

Si Jun nahimong chairman sa Radiology Dept., Perry Country Memorial Hospital (1983-97), Perryville, Missouri; Moss Regional Medical Center (2000-2004) Lake Charles, Louisiana. Sakop sa Board sa nuclear medicine specialist ug diagnostic radiologist nga nag-practice sa Estados Unidos.

Karong Biyernes sa alas siyete sa gabii iproklamar siya nga Garbo sa Sugbo ni Gob. Gwen Garcia.